Parlament depýtaty, Májilistegi Qazaqstan halqy Assambleıasy depýtattyq tobynyń jetekshisi Saýytbek Abdrahmanov Elbasynyń búgin jarııalanǵan «Táýelsizdik taǵylymy» atty maqalasyna qatysty pikir bildirdi.
«Elbasymyz Nursultan Nazarbaev der shaǵynda, ulystyń uly toıynyń dál qarsańynda jarııalaǵan «Táýelsizdik taǵylymy» atty eńbeginde: «Biz atom qarýynan óz erkimizben bas tartyp, búkilálemdik ıadrolyq qarýsyzdaný kóshin bastadyq. Bul – Qazaqstannyń jahandyq beıbitshilikti saqtaýǵa qosqan teńdessiz úlesi» dep atap aıtqan, qadap kórsetken. Iá, Qazaqstannyń álemdegi beıbitshilik jolyndaǵy sherýdiń kóshin bastaǵanynyń ózine otyz jyl tolyp otyr. Ony otyz jyldan beri búkil álem bilip, laıyqty baǵalap otyr», - dep atap ótti qoǵam qaıratkeri.
Saýytbek Abdrahmanovtyń pikirinshe, bul sózge dáleldi alystan izdeýdiń qajeti joq.
«Osydan eki kún buryn AQSh prezıdenti Djozef Baıdenniń Qazaqstan prezıdenti Qasym-Jomart Toqaevtyń atyna memleketimiz táýelsizdiginiń mereıtoıyna oraı joldaǵan quttyqtaýy jarııalandy. Onda: «Qazaqstannyń Ortalyq Azııada jáne búkil álemde beıbitshilik, turaqtylyq pen gúldenýdi saqtaý jolynda kósh bastap kele jatqanynyń 30 jyldyq mereıtoıy qarsańyndaǵy qýanyshyńyzǵa ortaqpyn» dep jazylǵan. Kim aıtsa da ońaı sóz emes. Álemdegi eń qýatty eldiń lıderi aıtsa, tipti salmaqty sóz. Al sodan, ıaǵnı Nursultan Nazarbaev qazaq jerindegi ajal aranyna óz qolymen qum quıyp, tajaldy tunshyqtyrǵannan nebári bes-aq jyl buryn biz qandaı el edik? Máskeý oıyndaǵysyn jasaıtyn, kadrlyq eksperıment ótkizip, topyraǵymyzǵa tabany tıip kórmegen kóldeneń kók attyny bizdi basqarýǵa jibere salatyn el emes pe edik? Sol eldiń etektegi basyn tórge shyǵaryp bergen eren erdiń keshe jarııa etilgen tolymdy tolǵaýy táýelsizdiktiń tar jol, taıǵaq keshýin áńgimeleýmen ǵana shektelmeıdi, egemendikke umtylýmen ótken halyqtyń eń qasıetti qundylyqty qandaılyq qasterleýge tıisti ekendigin de tebirene sóz etedi», - deıdi halyq qalaýlysy.
