Украина президенті Владимир Зеленский 4 наурыз күні кешке украин халқына үндеу жасады. Ол Ресеймен соғыстың 9-шы күні азаматтардың басқыншыларға қарсы күресін жалғастырып жатқанын, агрессордың шапқыншылығына украиндықтар ерлікпен, ынтымақпен, өзара көмекпен жауап бергенін баса айтты, деп хабарлайды "Адырна" ұлттық порталы.
Үндеу Президент кеңсесінің Facebook-тегі парақшасында жарияланды. Зеленский Украинадағы халық біртұтас, сондықтан біз өз жерімізді жаулардан азат ете аламыз деді.
"Біз тоғыз күн қараңғылыққа, тоғыз күн зұлымдыққа төтеп бердік. Бұл күткен қараңғылық пен зұлымдықтан үш есе көп", – деді президент.
Мемлекет басшысы украиндықтардың ресейлік басқыншыларға берген тойтарысын Еуропа мәңгі есте сақтайтынын, Харьков, Чернигов, Сумы, Вольноваха, Мариуполь, Николаев және басқа да елді мекендер бүкіл құрлыққа белгілі болатынын атап өтті.
"Адырна" ұлттық порталы
