قىتايدا داۋ تۋدىرعان قازاقستاندىق بلوگەر كەشىرىم سۇرادى. بۇل تۋرالى ول ءوز Instagram پاراقشاسىندا ۆيدەو جاريالادى، دەپ حابارلايدى “ادىرنا”.
جۋىردا قىتايدان ورالعان تانىمال قازاقستاندىق بلوگەر ارۋجان ايبەكوۆامەن ءتارتىپ ساقشىلارى پروفيلاكتيكالىق اڭگىمە جۇرگىزدى. بۇل ارەكەت ونىڭ الەۋمەتتىك جەلىلەردە كەڭىنەن تارالعان جانە قوعامدا ۇلكەن رەزونانس تۋدىرعان بەينەجازبالارىنا بايلانىستى بولدى.
جەلىدە تاراعان ءبىر ۆيدەودا ايبەكوۆا سەرىكتەسىنىڭ قالتاسىنان ۇيالى تەلەفوندى الىپ، ونى قىتاي ازاماتى – بوتەن بىرەۋگە بەرگەنى تۇسىرىلگەن. كەيىن ول سەرىكتەسىنە تەلەفوننىڭ جوعالعانىن ايتىپ، ءوزى بەرگەن ادامدى ۇرى رەتىندە كورسەتەدى.
سونداي-اق، قىز قىتايدىڭ كوشە مەن مەتروسىندا بەيتانىس ەر ادامدارعا جاقىنداپ، ولاردىڭ قولىنان ۇستاپ نەمەسە اياعىنا ءتيىپ كەتكەن. بۇل ارەكەتتەر اينالاسىنداعىلاردىڭ ابىرجۋ مەن تۇسىنىسپەۋشىلىگىن تۋدىرعان.
پوليتسيامەن بولعان اڭگىمە بارىسىندا ارۋجان بولعان جاعدايعا وكىنەتىنىن ايتىپ، كوپشىلىك الدىندا كەشىرىم سۇرادى:
«مەنىڭ ۆيدەوم ەشكىمدى قورلاۋدى ماقسات ەتپەدى. بۇل – ويلانباي جاريالانعان جازبا بولدى. ەگەر بىرەۋدىڭ كوڭىلىنە تيسەم، كەشىرىم سۇرايمىن. ەندى كونتەنت جاريالاۋ ماسەلەسىنە الدەقايدا جاۋاپكەرشىلىكپەن قارايمىن»، – دەدى ايبەكوۆا.
پوليتسيا وكىلدەرى الەۋمەتتىك جەلىلەردە ماتەريال جاريالاۋ كەزىندە وزگەلەرگە، اسىرەسە وزگە ەل ازاماتتارىنا قۇرمەتپەن قاراۋ كەرەكتىگىن ەسكە سالدى. مۇنداي ارەكەتتەر ارانداتۋشىلىق رەتىندە قابىلدانىپ، قوعامدا تەرىس رەاكتسيا تۋعىزۋى مۇمكىن.
