ازەربايجان ارقاشان سەرىكتەستەرىمەن تۇراقتى ءارى سەنىمدى قارىم-قاتىناستار ورناتۋعا ۇمتىلادى. بۇل تۋرالى ميللي ءماجىلىس دەپۋتاتى سولتان مامەدوۆ APA اگەنتتىگىنە بەرگەن سۇحباتىندا ايتتى، دەپ حابارلايدى «ادىرنا» ءتىلشىسى.
ول كەيبىر مەملەكەتتىڭ وسى ۇستانىمداردى ۇستانۋعا مۇددەلى ەمەس ەكەنىن مالىمدەدى. ايتۋىنشا، رەسەيدە ازەربايجانعا قارسى باستالعان ناۋقاندى ءدال وسى تۇرعىدان قاراستىرۋ قاجەت.
مامەدوۆ رەسەي مەملەكەتتىك دۋماسىنىڭ دەپۋتاتى كونستانتين ءزاتۋليننىڭ ازەربايجانعا باعىتتالعان مالىمدەمەلەرىنە پىكىر بىلدىرە وتىرىپ، كوپتەگەن رەسەيلىك ساياساتكەر مەن دەپۋتاتتاردىڭ بىرجاقتى ءارى نەگىزسىز پىكىرلەرى سەنىمدى قالپىنا كەلتىرۋگە زيانىن تيگىزەتىنىن اتاپ ءوتتى. بۇعان دەيىن زاتۋلين باكۋدىڭ بۇل شەشىمىن «ءۆانداليزمنىڭ ايقىن مىسالى» دەپ اتاعان بولاتىن.
ء«زاتۋليننىڭ جالعىز ماقساتى – ازەربايجان تۋرالى جاعىمسىز پىكىر قالىپتاستىرۋ. سول سەبەپتى ول ەلىمىزدى ءتۇرلى جولدارمەن سىناۋعا تىرىسۋدا. ارينە، ءبىز ودان ءادىل ءارى بەيتاراپ كوزقاراس كۇتىپ وتىرعان جوقپىز. ازەربايجان قوعامى ونداي اڭقاۋ ەمەس. الايدا ءبىز ءوز جەرىمىزدە كەز كەلگەن ماسەلە بويىنشا ەگەمەن شەشىم قابىلداۋعا تولىق قۇقىلىمىز جانە بۇل قۇقىقتى اركىم قۇرمەتتەۋى ءتيىس. ايۆازوۆسكيدىڭ ەسكەرتكىشى ازەربايجان ۇكىمەتى نەمەسە ءتيىستى مەملەكەتتىك ورگانداردىڭ شەشىمىمەن ورناتىلماعان، سوندىقتان ونىڭ الىنۋىن زاڭسىز ارەكەتتى جويۋ رەتىندە قابىلداۋ قاجەت»، — دەدى مامەدوۆ.
ازەربايجان ميللي ءماجىلىسىنىڭ دەپۋتاتى، ساياساتتانۋشى راسيم مۋسابەكوۆ تە ءزاتۋليننىڭ مالىمدەمەسىنە پىكىر ءبىلدىرىپ، ونىڭ پوستكەڭەستىك كەڭىستىكتەگى داۋلى بەدەلىن ەسكە سالدى.
«زاتۋلين ءوز قىزمەتىن سونشالىقتى ء“ساتتى” اتقارىپ ءجۇر. قازىر ول تمد ەلدەرىنىڭ كوبىنە، ءتىپتى ارمەنياعا دا كىرە المايدى. بۇل ساياساتكەردى ازەربايجاندا پوستكەڭەستىك كەڭىستىكتەگى سەپاراتيزمدى قولداۋشى، ارانداتۋشى رەتىندە جاقسى تانيدى. ول بۇعان دەيىن قاراباققا بىرنەشە رەت زاڭسىز كىرگەن، بىراق سول كەزدە قورلانعان ازەربايجان مەشىتتەرىن، بۇلىنگەن تاريحي مۇرامىزدى، سونداي-اق شۋشادا ورنالاسقان اتاقتى تۇلعالار — حۋرشيدبانۋ ناتاۆان، بيۋل-بيۋل جانە باسقا دا مادەنيەت قايراتكەرلەرىنىڭ اتقىلانعان ەسكەرتكىشتەرىن كورمەگەندەي كەيىپ تانىتتى. سوندىقتان، زاتۋلين، ايۆازوۆسكيدىڭ ەسىمىن ءوز ماقساتىڭا پايدالانبا. ونىڭ رۋحى سەنىڭ قورعانىڭا مۇقتاج ەمەس»،—دەدى ساياساتتانۋشى.
رەسەي پرەزيدەنتىنىڭ حالىقارالىق مادەني ىنتىماقتاستىق جونىندەگى ارنايى وكىلى ميحايل شۆىدكوي دا يۆان ايۆازوۆسكيدىڭ ءبيۋستىنىڭ الىنۋىنا قارسىلىق تانىتقان ەدى.
ازەربايجان سىرتقى ىستەر مينيسترلىگىنىڭ ءباسپاسوز حاتشىسى ايحان گادجيزادە جەرگىلىكتى باق-قا بەرگەن پىكىرىندە ساياساتكەردىڭ ء«تيىستى نۇسقاۋلىق بويىنشا انتيازەربايجاندىق ناۋقانعا العاش رەت قاتىسىپ وتىرماعانىن» ەكەنىن ەسكە سالدى.
«شۆىدكويدىڭ ازەربايجاندا ورىس مادەنيەتى “جويىلىپ جاتىر” دەگەن مالىمدەمەسى – تاعى ءبىر جالعان اقپارات. بۇل سالادا ەكى ەل اراسىندا ايقىن تەڭسىزدىك بولعانىنا قاراماستان، ازەربايجاندا ورىس مادەنيەتىن ەشكىم جوققا شىعارعان ەمەس. مىسالى ەلىمىزدە ورىس تەاترى جۇمىس ىستەيدى، ورىس تىلىندە ءبىلىم بەرەتىن مەكتەپتەر، باسىلىمدار بار. ال رەسەيدە ازەربايجان تىلىندە نە تەاتر، نە مەكتەپ، نە گازەت-جۋرنال جوق. سوعان قاراماستان، ءبىز رەسەيدە «ازەربايجان مادەنيەتىن جويىلىپ جاتىر» دەگەن مالىمدەمەلەر جاسامايمىز.رەسەيدىڭ جوعارى لاۋازىمدى تۇلعالارى ولاردىڭ انتيازەربايجاندىق ارەكەتتەرى مەن مالىمدەمەلەرى جالعاسا بەرسە، ازەربايجان مەن رەسەي اراسىنداعى وسى تەڭسىزدىك قايتا قارالۋى ابدەن مۇمكىن ەكەنىن ءتۇسىنۋى كەرەك»,–دەدى ول.
ەسكە سالايىق، ازەربايجان بيلىگى ستەپاناكەرت قالاسىندا (حانكەندي) ورىس سۋرەتشىسى يۆان ايۆازوۆسكيگە ورناتىلعان ەسكەرتكىشتى الىپ تاستاعان بولاتىن.
