اباي وبلىسىندا وتكەن ۇلى اقىن اباي قۇنانبايۇلىنىڭ مەرەيتويى كەزىندە سەنات توراعاسى، وبلىس اكىمى، مينيسترلەر جانە باسقا دا دەلەگاتتاردىڭ «قاۋىپسىزدىك شەڭبەرىمەن» قورشالىپ جۇرگەنى تۋرالى الەۋمەتتىك جەلىلەردە تاراعان ۆيدەو قوعام نازارىن اۋداردى. بۇل جاعدايعا قاتىستى پارلامەنت سەناتىنىڭ ءباسپاسوز حاتشىسى دانيار رامازانوۆ بەردى، دەپ حابارلايدى «ادىرنا» ءتىلشىسى.
«راسىمەن، مۇنداي ارەكەتتىڭ مۇلدەم ورىنسىز ەكەنىنە ەشقانداي كۇمان جوق. ءبىز اتالعان جايتتى كورگەن بويدا ەرىكتىلەردەن ونى دوعارىپ، باسقا، ماڭىزدى ىستەرمەن اينالىسۋىن سۇرادىق. وسىلايشا، بۇل جاعداي وتە قىسقا ۋاقىتقا عانا جالعاستى. ال قالعان ۋاقىتتا ءبىز كيىز ۇيلەر قالاشىعىندا ەركىن ءجۇرىپ-تۇردىق. مەرەكەگە كەلگەن كەز كەلگەن ادام سەنات توراعاسىمەن كەزدەسىپ، امانداسىپ، پىكىرلەسكەنىن وسى ۆيدەودان-اق انىق كورۋگە بولادى. ۇزاق ءتۇسىندىرىپ جاتقاننان گورى، ءبىر رەت كورسەتىپ، ماسەلەنى وسى جەردەن جاپقان دۇرىس دەپ ويلايمىن»،—دەدى ول.
ءباسپاسوز حاتشىسى كەيبىر جەلى قولدانۋشىسىنىڭ تويدى تەك وسى كەلەڭسىز جايتپەن بايلانىستىرۋىن سىنعا الدى.
«وكىنىشكە قاراي، كەيبىر جەلى قولدانۋشىسى ون كۇن بويى اتالىپ وتكەن ءدۇبىرلى تويدى جالعىز وسى كەلەڭسىزدىكپەن بايلانىستىرىپ، «جەردەن جەتى قويان تاپقانداي» جارىسا جازىپ جاتىر. ال، ءبىز ويشىل وسيەت ەتكەندەي، قالپىمىز بەن سانامىزدى تازا ۇستاساق، جارقىن ساتتەرگە كوبىرەك ءمان بەرسەك، وسى ءبىر ۇلاعاتتى ىستەن ونەگە الساق دەيمىز»،—دەپ تولىقتىردى رامازانوۆ.
