استانا قالاسى اكىمدىگىنىڭ مۋزىكالىق جاس كورەرمەن تەاترى كورەرمەن قاۋىمعا جاڭا تۋىندىنى ۇسىنباق.
19 قىركۇيەكتە ساعات 19:00-دە، سونداي-اق 20-21 قىركۇيەك كۇندەرى ساعات 18:00-دە قازاقتىڭ ۇلى ويشىلى، اقىنى جانە كومپوزيتورى شاكارىم قۇدايبەردىۇلىنا ارنالعان «شاكارىم» مۋزىكالىق دراماسىنىڭ پرەمەراسى وتەدى.
ەرمەك امانشاەۆتىڭ قالامىنان تۋعان بۇل شىعارما — ۇلت رۋحانياتىنىڭ اسىل مۇراسىن ساحنا تىلىمەن جەتكىزەتىن تەرەڭ فيلوسوفيالىق دراما. قويىلىمدا شاكارىمنىڭ كۇردەلى ءومىر جولى، اقتاڭداق كەزەڭدەرى، رۋحاني ىزدەنىستەرى، ماحاببات پەن ادىلەتكە دەگەن كوزقاراسى بەينەلەنەدى. سونداي-اق ونىڭ ۇلى ۇستازى اباي قۇنانبايۇلىمەن رۋحاني بايلانىسى، اعالىق قامقورلىعى مەن ازاماتتىق ۇستانىمى ەرەكشە كورىنىس تابادى.
مۋزىكالىق دراما بىرنەشە ساحنالىق كورىنىستەردەن تۇرادى. وندا شاكارىمنىڭ تۇلعاسى جان-جاقتى اشىلىپ، ونىڭ شىعارماشىلىق مۇراسى مەن رۋحاني قۇندىلىقتارى دارىپتەلەدى. قويىلىم وسكەلەڭ ۇرپاققا ىزگىلىك پەن مەيىرىمدىلىككە نەگىزدەلگەن ادامي قاسيەتتەردى ۇلگى ەتۋدى ماقسات تۇتادى.
قويىلىم شىعارماشىلىق توبى دا ەلىمىزدىڭ تانىمال ونەر يەلەرىنەن قۇرالعان:
قويۋشى-رەجيسسەرى – قازاقستاننىڭ ەڭبەك سىڭىرگەن قايراتكەرى اسحات ماەميروۆ
كومپوزيتورى – باۋىرجان اقتاەۆ («ەرەن ەڭبەگى ءۇشىن» مەدالىنىڭ يەگەرى، مادەنيەت سالاسىنىڭ ۇزدىگى)
قويۋشى حورمەيستەرى – عالىمجان بەرەكەشوۆ
قويۋشى سۋرەتشىسى – الما سىرباەۆا
قويۋشى بالەتمەيستەرلەرى – اننا تسوي، سۇلتانبەك عۇماروۆ
حورەوگرافتار – ايگۇل اماندىقوۆا، كاميلا بۋزانوۆا، جەتكەرگەن تومانوۆ، ەربول سەمكۋلوۆ
حورمەيستەرلەر – شىڭعىس ايماق، جانسۇلۋ تولەگەن، جانعالي تەمىرعاليەۆ
جارىق قويۋ سۋرەتشىسى – ەرمەك مۇحتارۇلى
دىبىس رەجيسسەرى – اسىلجان اسقاروۆ
