قازاقستاننىڭ ءىرى ەنەرگەتيكالىق حولدينگى "سامۇرىق-ەنەرگو" بۇقتىرما گيدروەلەكتروستانتسياسىنداعى (گەس) ۇلەسىن ەنشىلەس كومپانياسى — Qazaq Green Power PLC-كە بەردى، دەپ حابارلايدى “ادىرنا”.
KASE (قازاقستان قور بيرجاسى) سايتىندا جاريالانعان مالىمەتكە سايكەس، "سامۇرىق-ەنەرگو" ەندى او "بۇقتارما گيدروەلەكتروستانتسياسى" كومپانياسىنىڭ 96,32% اكتسياسىنا تىكەلەي يەلىك ەتپەيدى. الايدا حولدينگ بۇل ۇلەستى تولىقتاي وزىنە تيەسىلى Qazaq Green Power PLC كومپانياسىنا بەرگەن. دەمەك، "سامۇرىق-ەنەرگو" جاناما تۇردە بۇقتىرما گەس-ءىن باسقارۋدى جالعاستىرىپ وتىر.
"سامۇرىق-ەنەرگو" رەسمي تۇسىنىكتەمەسىندە بۇل شەشىم جاڭارتىلاتىن ەنەرگيا كوزدەرى (جەك) مەن گيدروەنەرگەتيكا سالاسىنداعى اكتيۆتەردى ءبىر زاڭدى قۇرىلىمعا — Qazaq Green Power PLC-كە — شوعىرلاندىرۋ ماقساتىندا قابىلدانعانىن اتاپ ءوتتى.
«بۇل قۇرىلىم “جاسىل” ەنەرگەتيكانى دامىتۋعا ماماندانعان. بۇقتىرما گەس-ءىن بەرۋ Qazaq Green Power PLC-ءنىڭ جارعىلىق كاپيتالىن ارتتىرۋ جولىمەن جۇزەگە اسىرىلدى. وسىلايشا، Qazaq Green Power-عا "سامۇرىق-ەنەرگو" يەلىگىندەگى 96,3% اكتسيا بەرىلدى»، — دەلىنگەن كومپانيا حابارلاماسىندا.
بۇعان دەيىن، 2025 جىلدىڭ اقپان ايىندا ءدال وسىنداي جولمەن وسكەمەنجانە ءشۇلبى گەس-تەرى دە Qazaq Green Power قۇرامىنا وتكەن بولاتىن.
بۇقتىرما گەس-ءى — قازاقستانداعى ەكىنشى ءىرى سۋ ەلەكتر ستانتسياسى. ول شىعىس قازاقستان وبلىسىندا، ەرتىس وزەنىندە، بۇقتىرما وزەنىنىڭ ساعاسىنان تومەن ورنالاسقان. ستانتسيانىڭ جوبالىق قۋاتى — 675 مۆت. ونىڭ قۇرىلىسى 1953 جىلى باستالىپ، نەگىزگى اگرەگاتتار 1960–1966 جىلدارى ىسكە قوسىلدى.
گەس ينفراقۇرىلىمى ەلىمىزدەگى ەڭ ۇلكەن سۋ قويماسى — بۇقتارمانى قۇرايدى. ستانتسيا ەرتىس كاسكادىنىڭ جوعارعى ساتىسى بولىپ سانالادى.
سونداي-اق، 1997 جىلدان بەرى گەس كاسىپورنى «قازمىرىش» (كازتسينك) كومپانياسىنا كونتسەسسياعا بەرىلگەن. قازىرگى كەلىسىمشارت 2028 جىلدىڭ سوڭىنا دەيىن جارامدى. 2025 جىلدىڭ اقپانىندا بۇقتىرما گەس-ءى مۇلكىن ۇزاق مەرزىمگە جالعا بەرۋ بويىنشا ءىرى مامىلە جاسالعان.
ال Qazaq Green Power PLC — 2022 جىلدىڭ قىركۇيەگىندە قۇرىلعان جانە 100% "سامۇرىق-ەنەرگوعا” تيەسىلى. كومپانيا استانا حالىقارالىق قارجى ورتالىعىنىڭ مۇشەسى.
كومپانيانىڭ باستى ماقساتتارى:
1. ەنەرگەتيكا سالاسىنا جاڭا تەحنولوگيالار ەنگىزۋ جانە جاڭا قۋات كوزدەرىن سالۋعا ىقپال ەتۋ;
2. ەنەرگوجۇيەلەردىڭ تيىمدىلىگىن ارتتىرۋ;
3. قازاقستانداعى ينۆەستيتسيالىق جوبالاردى ىسكە اسىرۋ;
4. ەلەكتر ەنەرگەتيكاسى سالاسىنداعى رەفورمالاردى جۇزەگە اسىرۋ;
5. ەنەرگيا ۇنەمدەۋ جانە ەكولوگيالىق قاۋىپسىزدىك شارالارىن جۇرگىزۋ.
بۇعان دەيىن، 2023 جىلى Qazaq Green Power PLC-ءدى IPO-عا شىعارۋ 2024 جىلعا جوسپارلانعان بولاتىن. الايدا 2025 جىلدىڭ شىلدەسىندە قر پرەمەر-ءمينيسترى كومپانيانى اشىق نارىققا شىعارۋ مەرزىمى 2029–2030 جىلدارعا شەگەرىلگەنىن مالىمدەدى.
