Qazaqstannyŋ ırı energetikalyq holdingı "Samūryq-Energo" Būqtyrma gidroelektrostansiiasyndaǧy (GES) ülesın enşıles kompaniiasy — Qazaq Green Power PLC-ke berdı, dep habarlaidy “Adyrna”.
KASE (Qazaqstan qor birjasy) saitynda jariialanǧan mälımetke säikes, "Samūryq-Energo" endı AO "Būqtarma Gidroelektrostansiiasy" kompaniiasynyŋ 96,32% aksiiasyna tıkelei ielık etpeidı. Alaida holding būl ülestı tolyqtai özıne tiesılı Qazaq Green Power PLC kompaniiasyna bergen. Demek, "Samūryq-Energo" janama türde Būqtyrma GES-ın basqarudy jalǧastyryp otyr.
"Samūryq-Energo" resmi tüsınıktemesınde būl şeşım jaŋartylatyn energiia közderı (JEK) men gidroenergetika salasyndaǧy aktivterdı bır zaŋdy qūrylymǧa — Qazaq Green Power PLC-ke — şoǧyrlandyru maqsatynda qabyldanǧanyn atap öttı.
«Būl qūrylym “jasyl” energetikany damytuǧa mamandanǧan. Būqtyrma GES-ın beru Qazaq Green Power PLC-nıŋ jarǧylyq kapitalyn arttyru jolymen jüzege asyryldy. Osylaişa, Qazaq Green Power-ǧa "Samūryq-Energo" ielıgındegı 96,3% aksiia berıldı», — delıngen kompaniia habarlamasynda.
Būǧan deiın, 2025 jyldyŋ aqpan aiynda däl osyndai jolmen Öskemenjäne Şülbı GES-terı de Qazaq Green Power qūramyna ötken bolatyn.
Būqtyrma GES-ı — Qazaqstandaǧy ekınşı ırı su elektr stansiiasy. Ol Şyǧys Qazaqstan oblysynda, Ertıs özenınde, Būqtyrma özenınıŋ saǧasynan tömen ornalasqan. Stansiianyŋ jobalyq quaty — 675 MVt. Onyŋ qūrylysy 1953 jyly bastalyp, negızgı agregattar 1960–1966 jyldary ıske qosyldy.
GES infraqūrylymy elımızdegı eŋ ülken su qoimasy — Būqtarmany qūraidy. Stansiia Ertıs kaskadynyŋ joǧarǧy satysy bolyp sanalady.
Sondai-aq, 1997 jyldan berı GES käsıporny «Qazmyryş» (Kazsink) kompaniiasyna konsessiiaǧa berılgen. Qazırgı kelısımşart 2028 jyldyŋ soŋyna deiın jaramdy. 2025 jyldyŋ aqpanynda Būqtyrma GES-ı mülkın ūzaq merzımge jalǧa beru boiynşa ırı mämıle jasalǧan.
Al Qazaq Green Power PLC — 2022 jyldyŋ qyrküiegınde qūrylǧan jäne 100% "Samūryq-Energoǧa” tiesılı. Kompaniia Astana halyqaralyq qarjy ortalyǧynyŋ müşesı.
Kompaniianyŋ basty maqsattary:
1. Energetika salasyna jaŋa tehnologiialar engızu jäne jaŋa quat közderın saluǧa yqpal etu;
2. Energojüielerdıŋ tiımdılıgın arttyru;
3. Qazaqstandaǧy investisiialyq jobalardy ıske asyru;
4. Elektr energetikasy salasyndaǧy reformalardy jüzege asyru;
5. Energiia ünemdeu jäne ekologiialyq qauıpsızdık şaralaryn jürgızu.
Būǧan deiın, 2023 jyly Qazaq Green Power PLC-dı IPO-ǧa şyǧaru 2024 jylǧa josparlanǧan bolatyn. Alaida 2025 jyldyŋ şıldesınde QR Premer-Ministrı kompaniiany aşyq naryqqa şyǧaru merzımı 2029–2030 jyldarǧa şegerılgenın mälımdedı.
