ماڭعىستاۋ وبلىسىندا مەرزىمدى اسكەري قىزمەت وتكەرىپ جۇرگەن اسكەري قىزمەتكەر قازا تاپتى. اقپاراتتى ۇلتتىق قاۋىپسىزدىك كوميتەتى راستادى، دەپ حابارلايدى «ادىرنا» ءتىلشىسى.
قايعىلى وقيعا 7 قازاندا بولعان.
«الدىن الا مالىمەت بويىنشا، قايعىلى جاعدايعا تەحنيكالىق جۇمىستار كەزىندە قاۋىپسىزدىك شارالارىن ساقتاماۋ سەبەپ بولعان. پوليتسيا ورگاندارى قىلمىستىق ءىس قوزعادى، قوسىمشا قىزمەتتىك تەرگەۋ جۇرگىزىلۋدە»، - دەلىنگەن حابارلامادا.
بۇعان دەيىن ماڭعىستاۋ وبلىسىندا Cۇلتان شىنتەمىروۆ جانە نۇرگەلدى بايىش ەسىمدى جاس ساربازدار جىندىحاناعا تۇسكەن ەدى.
ايتا كەتەيىك، ەلىمىزدە اسكەر قاتارىندا جۇرگەن ساربازداردىڭ ءولىمى جيىلەپ بارادى. ماسەلەن، 17 قىركۇيەكتە الماتى وبلىسىندا 19 جاستاعى سارباز دىنمۇحاممەد شىناربەكتىڭ دەنەسى تابىلدى. رەسمي نۇسقا بويىنشا، ول ءوزىن-ءوزى ولتىرگەن دەلىنگەن، الايدا تۋىستارى بۇعان سەنبەيدى. ولار ىسكە پرەزيدەنتتىڭ ارالاسۋىن جانە تاۋەلسىز تەرگەۋ جۇرگىزىلۋىن تالاپ ەتىپ وتىر.
23 قىركۇيەكتە جەتىسۋ گارنيزونى دەسانتتىق-شابۋىلداۋ اسكەرلەرىنىڭ قۇرامىندا مەرزىمدى اسكەري قىزمەتتەن ءوتىپ جاتقان سارباز وق جاراقاتىنان كوز جۇمعان ەدى. قايعىلى جاعداي بويىنشا قىلمىستىق ءىس قوزعالىپ، قورعانىس ءمينيسترى بۇل وقيعانى باقىلاۋعا العانىن مالىمدەدى.
4 قازاندا الماتىداعى اسكەري بولىمدە سارباز ءۇشىنشى قاباتتان سەكىرىپ، اۋرۋحاناعا ءتۇستى. قىزمەت بارىسىندا دارىگەرلەر اسكەري قىزمەتكەرگە "بەيىمدەلۋىندە اقاۋى بار" دياگنوزىن قويعان.
ال 5 قازاندا الماتى وبلىسىندا قاراساي شەكارا بولىمىندە اسكەرگە كەتكەنىنە ءبىر اپتا بولعان سارباز قازا بولعان ەدى.
