Human Rights Watch حالىقارالىق قۇقىق قورعاۋ ۇيىمى تاجىكستان بيلىگىن رەسەي پرەزيدەنتى ۆلاديمير ءپۋتيندى ەلگە كىرگىزۋگە تىيىم سالۋعا نەمەسە ول كەلگەن جاعدايدا تۇتقىنداۋعا شاقىردى. بۇل تۋرالى ۇيىم 8 قازان كۇنى جاريالاعان مالىمدەمەسىندە جازدى، دەپ حابارلايدى «ادىرنا» ءتىلشىسى.
ۇيىمنىڭ ايتۋىنشا، بۇل تالاپ حالىقارالىق قىلمىستىق سوتتىڭ پۋتينگە قاتىستى شىعارعان وردەرىنە نەگىزدەلگەن.
بۇعان دەيىن كرەمل ءپۋتيننىڭ 9 قازان كۇنى تاجىكستانعا «ورتالىق ازيا - رەسەي» سامميتىنە جانە تاۋەلسىز مەملەكەتتەر دوستاستىعىنىڭ وتىرىسىنا قاتىسۋ ءۇشىن باراتىنىن حابارلاعان.
حالىقارالىق قىلمىستىق سوت 2023 جىلدىڭ 17 ناۋرىزىندا پۋتين مەن رەسەيدەگى بالا قۇقىقتارى جونىندەگى ۋاكىل ماريا لۆوۆا-بەلوۆاعا وردەر شىعارعان بولاتىن. ولار ۋكراينادان رەسەيگە جانە رەسەي باسىپ العان اۋماقتارعا بالالاردى زاڭسىز دەپورتاتسيالاۋ جانە كوشىرۋ سىندى سوعىس قىلمىستارىن جاسادى دەپ ايىپتالدى.
«پۋتين حالىقارالىق سامميتتەرگە قاتىسپاي، گااگا سوتىنىڭ الدىندا جاۋاپ بەرۋى كەرەك»، — دەدى Human Rights Watch ۇيىمىنىڭ حالىقارالىق ادىلەت جونىندەگى ديرەكتورى ليز ەۆەنسون.
ونىڭ ايتۋىنشا، ءپۋتيندى تاجىكستاندا قابىلداۋ – رەسەيدىڭ ۋكرايناداعى قىلمىستارىنان زارداپ شەككەن جابىرلەنۋشىلەردىڭ تاعدىرىنا جانە ەلدىڭ حالىقارالىق مىندەتتەمەلەرىنە نەمقۇرايدىلىق تانىتۋ بولماق.
ۇيىم تاجىكستاننىڭ 2002 جىلى حالىقارالىق قىلمىستىق سوتقا قوسىلعانىن جانە ونىڭ تالاپتارىن ورىنداۋعا، سونىڭ ىشىندە ىزدەۋدە جۇرگەن تۇلعالاردى تۇتقىنداۋعا مىندەتتى ەكەنىن مالىمدەدى.
سەريك مالەەۆ. كيەۆ موجەت زاموروزيت موسكۆۋ حوت زاۆترا. چتو دليا روسسيسكوي ستوليتسى راۆنوزناچنو سمەرتي
