حالىقارالىق رەكورد. تۇركىستاندا ەڭ ۇلكەن ساۋكەلە تىگىلدى

تۇركىستاندا تىگىلگەن الىپ ساۋكەلە قازاقستاننىڭ رەكوردتار كىتابىنا رەسمي تۇردە ەنگىزىلدى، دەپ حابارلايدى "ادىرنا" ۇلتتىق پورتالى.

بيىكتىگى 5 مەتر 20 سانتيمەترگە جەتەتىن بۇل ەرەكشە ۇلتتىق باس كيىم ايەلدەرگە ارنالعان ءداستۇرلى ساۋكەلەنىڭ ۇلگىسىندە جاسالعان. ونىڭ جابۋىنىڭ ۇزىندىعى 600 مەتردى قۇرايدى، ال بەزەندىرىلۋىندە 30-دان استام تۇركى حالىقتارىنىڭ ويۋ-ورنەكتەرى قولدانىلعان.

ساۋكەلە تەك ۇلتتىق رەكوردپەن شەكتەلمەي، حالىقارالىق دەڭگەيدە دە مويىندالدى.

تىگىنشىلەردىڭ ەڭبەگى Global Book of Records كىتابىنا ەنگىزىلىپ، ارنايى سەرتيفيكات تابىستالدى.

قازاقستان رەكوردتار كىتابىنىڭ رەسمي وكىلى قۋاندىق قۇدايبەرگەنوۆ تۇركىستانعا ارنايى كەلىپ، رەكوردتىق جەتىستىكتى جاريالادى. ول الەمدە مۇنداي كولەمدەگى باس كيىم بۇرىن-سوڭدى جاسالماعانىن اتاپ ءوتىپ، جوبا گيننەستىڭ الەمدىك رەكوردتار كىتابىنا تىركەۋگە ۇسىنىلعانىن حابارلادى.

جوبانىڭ اۆتورى اقمارال داۋىلباەۆا ساۋكەلەنىڭ تەرەڭ سيمۆولدىق مانىنە توقتالدى.

«ساۋكەلەمىزدىڭ بيىكتىگى كوكپەن تالاسىپ، شىڭمەن تىرەسىپ تۇرسىن دەدىك. سوندىقتان ونى 5 مەتر 20 سانتيمەتر ەتىپ جاسادىق. ال ويۋ-ورنەگىن ءومىر اعاشى بەينەسىندە ورنەكتەپ، جەر انانىڭ بەينەسىن بەرۋدى ماقسات ەتتىك. ءبىر قولىمەن الەمدى، ءبىر قولىمەن بەسىكتى تەربەتكەن انا — ءومىردىڭ ماڭگىلىگىن بىلدىرەدى»، — دەدى ول.

بىرەگەي جوبا ۇلتتىق ونەر مەن رۋحاني ساباقتاستىقتى دارىپتەپ، قازاقتىڭ ءداستۇرلى كيىم مادەنيەتىنىڭ باي مۇراسىن جاڭا بيىككە كوتەردى.