قالا اكىمى ازىمبەك پازىلبەكۇلى قالا اۋماعىنداعى الەۋمەتتىك جانە ينفراقۇرىلىمدىق ماڭىزى زور نىسانداردى ارالاۋ بارىسىندا جاقىندا پايدالانۋعا بەرىلەتىن سپورت كەشەندەرى مەن مادەنيەت ءۇيىنىڭ قۇرىلىس جۇمىستارىمەن تانىستى.
الدىمەن قالا م.تولەباەۆ كوشەسىندە ورنالاسقان ءا.نۇرماحانوۆ اتىنداعى سپورت كەشەنىندە بولدى. كەشەندە جاسوسپىرىمدەر مەن بالالار كۇرەس، بوكس، فۋتبول سىندى سپورت تۇرلەرىمەن جاتتىعا الادى. جالپى اۋماعى 4000 م²، ىشكى الاڭى 713,84 م² قۇرايتىن زاماناۋي سپورت نىسانى 2024 جىلدىڭ مامىر ايىندا باستالىپ، بۇگىندە تولىق اياقتالعان.
قازىرگى تاڭدا قالادا بۇدان وزگە سپورتتىڭ كۇرەس، بوكس تۇرلەرىنە ارنالعان 4 كەشەن - ماقاتاەۆ كوشەسىندە، بەكزات مولتەك اۋدانىندا، تەرىسكەي كوشەسىندە جانە باياناۋىل اۋماعىندا سالىنىپ جاتىر.
ال 500 ورىندىق كورەرمەن زالى بار، زاماناۋي تالاپتارعا ساي سالىنعان كوپفۋنكتسيونالدى مادەنيەت ءۇيىنىڭ قۇرىلىسى تولىق اياقتالىپ، كونستيتۋتسيا كۇنىنە وراي كورەرمەندەرىن قۋانتۋ ءۇشىن دايىندىقتى باستاپ كەتتى.
ساپاسى مەن ستاندارتتارعا سايكەستىگىن باقىلاعان قالا باسشىسى - ازىمبەك پازىلبەكۇلى جاۋاپتى مەردىگەر مەكەمەلەرگە ەسكەرتپەلەر مەن كەمشىلىكتەردى بەلگىلەنگەن مەرزىمدە تولىق اياقتاپ، حالىق يگىلىگىنە پايدالانۋعا بەرۋدى تاپسىردى.
الەۋمەتتىك نىساندار 29 تامىز كۇنى رەسمي تۇردە اشىلىپ، ەل يگىلىگىنە تابىستالادى.
ۇقساس جاڭالىقتار
