وقۋ-اعارتۋ مينيسترلىگى، جەتەكشى جوعارى وقۋ ورىندارى مەن «دارىن» رەسپۋبليكالىق عىلىمي-پراكتيكالىق ورتالىعىنىڭ بىرقاتار لاۋازىمدى تۇلعالارى مەن قىزمەتكەرلەرى تارتىپتىك جازاعا تارتىلدى. بۇل شارالار جوعارى اۋديتورلىق پالاتانىڭ تاپسىرماسى بويىنشا جۇزەگە اسىرىلعان، دەپ حابارلايدى «ادىرنا» ءتىلشىسى Zakon.kz-كە سىلتەمە جاساپ.
«بيىل اقپان ايىندا ورتا ءبىلىم بەرۋدى دامىتۋعا باعىتتالعان بيۋدجەت قاراجاتىنىڭ ءتيىمدى پايدالانىلۋىنا باعا بەرۋ ماقساتىندا مەملەكەتتىك اۋديت جۇرگىزىلدى. تەكسەرۋ بارىسىندا اۋديت ماماندارى پەداگوگتەردى دايارلاۋ مەن جۇمىسقا ورنالاستىرۋ، وقۋ پروتسەسىن ادىستەمەلىك تۇرعىدا قامتاماسىز ەتۋ، مەملەكەتتىك رەتتەۋ جانە باسقا دا باعىتتار بويىنشا بىرقاتار ماسەلە مەن كەمشىلىك انىقتادى»، - دەلىنگەن حابارلامادا.
تارتىپتىك جاۋاپكەرشىلىككە تارتىلعان رەكتورلار مەن شەنەۋنىكتەر ءتىزىمى جاريالانعانىمەن، وندا ادام اتتارى كورسەتىلمەگەن.
وسىعان بايلانىستى پالاتا ۋاكىلەتتى مەملەكەتتىك ورگاندار مەن ۇيىمداردىڭ باسشىلارىنا زاڭ بۇزۋشىلىقتارعا جول بەرگەن لاۋازىمدى تۇلعالاردى جاۋاپكەرشىلىككە تارتۋ تۋرالى ماسەلەنى قاراۋدى تاپسىرعان.
تارتىپتىك جازاعا مىنا لاۋازىمدى تۇلعالار مەن قىزمەتكەرلەر تارتىلدى:
- وقۋ-اعارتۋ مينيسترلىگىنىڭ ورتا ءبىلىم كوميتەتى توراعاسىنىڭ ورىنباسارى;
- وقۋ-اعارتۋ مينيسترلىگىنىڭ ءبىلىم ساپاسىن قامتاماسىز ەتۋ كوميتەتى توراعاسىنىڭ ورىنباسارى;
- ش. ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتىنىڭ رەكتورى;
- ق. ا. ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەكتورى;
- ى. التىنسارين اتىنداعى ارقالىق پەداگوگيكالىق ينستيتۋتىنىڭ پرورەكتورى;
- س. امانجولوۆ اتىنداعى شىعىس قازاقستان ۋنيۆەرسيتەتىنىڭ پرورەكتورى;
- ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى;
- م. وتەمىسوۆ اتىنداعى باتىس قازاقستان ۋنيۆەرسيتەتىنىڭ پرورەكتورى;
- قورقىت اتا اتىنداعى قىزىلوردا ۋنيۆەرسيتەتىنىڭ پرورەكتورى;
- اكادەميك ا. قۋاتبەكوۆ اتىنداعى حالىقتار دوستىعى ۋنيۆەرسيتەتىنىڭ پرورەكتورى;
- ش. مۇرتازا اتىنداعى حالىقارالىق تاراز يننوۆاتسيالىق ينستيتۋتىنىڭ پرورەكتورى;
- م. قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ دەكانى;
- ا. مىرزاحمەتوۆ اتىنداعى كوكشەتاۋ ۋنيۆەرسيتەتىنىڭ كافەدرا مەڭگەرۋشىلەرى;
- ى. التىنسارين اتىنداعى ۇلتتىق ءبىلىم اكادەمياسىنىڭ قارجى-ەكونوميكا دەپارتامەنتىنىڭ ديرەكتورى جانە جەتەكشى عىلىمي قىزمەتكەرلەرىنىڭ ءبىرى;
- م. اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ ماماندارى.
سونىمەن قاتار تارتىپتىك جازاعا «دارىن» رەسپۋبليكالىق عىلىمي-پراكتيكالىق ورتالىعىنىڭ ءبولىم باسشىلارى مەن ادىسكەرلەرى دە تارتىلدى.
