ۋكراينا مەن رەسەي اراسىندا تۇتقىن الماسۋ تۋرالى كەلىسىم جاسالدى. بۇل تۋرالى ۋكراينا ۇلتتىق قاۋىپسىزدىك جانە قورعانىس كەڭەسىنىڭ حاتشىسى رۋستەم ۋمەروۆ مالىمدەدى، دەپ حابارلايدى «ادىرنا» ءتىلشىسى.
ايتۋىنشا، ەل پرەزيدەنتى ۆلاديمير زەلەنسكيدىڭ تاپسىرماسىمەن ۋكراينا سوڭعى كۇندەرى تۇركيا جانە بىرىككەن اراب امىرلىكتەرىندەگى سەرىكتەستەرىمەن كەلىسسوزدەر جۇرگىزگەن. بۇل مەملەكەتتەر تۇتقىنداردى الماستىرۋ جانە ولاردى وتانىنا قايتارۋ پروتسەسىن ۇيىمداستىرۋعا كومەكتەسىپ جاتىر.
قازىرگى تاڭدا شامامەن 1200 ۋكراينالىقتى قايتارۋ بويىنشا جۇمىس ءجۇرىپ جاتقانى بەلگىلى بولدى.
«كەلىسسوزدەر ناتيجەسىندە تاراپتار ىستانبۇل كەلىسىمدەرىن ىسكە قوسۋعا كەلىستى. الداعى ۋاقىتتا بارلىق راسىمدىك جانە ۇيىمداستىرۋشىلىق ماسەلەلەردى بەكىتەتىن تەحنيكالىق كونسۋلتاتسيالار وتەدى. ءبىز ءۇزىلىسسىز جۇمىس ىستەپ جاتىرمىز. تۇتقىندا وتىرعان ۋكرايندار جاڭا جىل مەن روجدەستۆو مەرەكەلەرىن ءوز ۇيلەرىندە قارسى السا ەكەن دەيمىز»،- دەپ جازدى ول Telegram-ارناسىندا.
ەسكە سالايىق، 2 ماۋسىم كۇنى ىستانبۇلدا وتكەن كەلىسسوزدەر بارىسىندا رەسەي مەن ۋكراينا اۋىر جارالانعان اسكەريلەر مەن 25 جاسقا دەيىنگى تۇتقىنداردى الماستىرۋعا، سونداي-اق ءبىر-بىرىنە 6000 قازا تاپقان اسكەري قىزمەتكەردىڭ دەنەسىن تاپسىرۋعا كەلىسكەن ەدى.
