سانكت-پەتەربۋرگ قالاسىندا ۇلت ۇستازى احمەت بايتۇرسىنۇلى مەن الاش قايراتكەرلەرىنە قاتىستى بۇرىن عىلىمي اينالىمعا ەنبەگەن سيرەك كىتاپتاردىڭ ەسكى باسىلىمدارى تابىلدى، دەپ حابارلايدى "ادىرنا" ۇلتتىق پورتالى Almaty.tv-عا سىلتەپ.
رەسەيدىڭ مادەني استاناسىنا ءىس-ساپارمەن بارعان ا.بايتۇرسىنۇلى اتىنداعى ءتىل ءبىلىمى ينستيتۋتىنىڭ قىزمەتكەرلەرى تاريحي ماڭىزى زور 400-گە جۋىق قۇندى كىتاپتىڭ ەسكى باسىلىمىن ەلەكتروندى فورماتتا ەلگە جەتكىزدى.
زەرتتەۋ جۇمىستارىنا قاتىسقان ءتىل مامانى اسەم نىشانالىقىزى ارىپتەستەرىمەن بىرگە سانكت-پەتەربۋرگتەگى رەسەي ۇلتتىق كىتاپحاناسى، ورتالىق عىلىمي كىتاپحانا، شىعىستانۋ ينستيتۋتى جانە كينو-فوتو-فون قۇجاتتار ءارحيۆى سىندى بىرنەشە ىرگەلى مەكەمەلەرگە بارىپ، بۇرىن قولجەتىمسىز بولىپ كەلگەن ەڭبەكتەرمەن تانىسقان.
"كوپتەگەن كىتاپحانا مەن ارحيۆتەردە جۇمىس ىستەدىك. وكىنىشكە قاراي، تۇپنۇسقالاردىڭ ءوزىن الىپ شىعۋعا مۇمكىندىك بولمادى، سەبەبى تالاپتار مەن شەكتەۋلەر بار. سوندىقتان بارلىق ماتەريالدى سۋرەتكە ءتۇسىرىپ، ەلەكتروندى فورماتتا جيناقتاپ اكەلدىك", — دەيدى اسەم نىشانالىقىزى.
ساپار بارىسىندا زەرتتەۋشىلەر تەلجان شونانۇلىنىڭ بۇرىن بەيمالىم بولىپ كەلگەن ەڭبەكتەرىن، مىرجاقىپ دۋلاتۇلىنىڭ تىڭ اۋدارمالارىن، سونداي-اق احمەت بايتۇرسىنۇلىنىڭ ء«تىل-قۇرال» كىتابىنىڭ ەڭ العاشقى باسىلىمدارىن انىقتاعان.
"بۇرىن ءبىز قول جەتكىزە الماعان كوپتەگەن دەرەكتەر تابىلدى. سانكت-پەتەربۋرگ بۇرىن يمپەريا استاناسى بولعاندىقتان، سول كەزەڭدە شىققان ەڭبەكتەردىڭ ءبىر داناسى مىندەتتى تۇردە مۇندا جيناقتالعان. كىتاپتار وتە جاقسى ساقتالعان", — دەيدى احمەتتانۋ ءبولىمىنىڭ مەڭگەرۋشىسى ەرمۇحامەد مارالبەك.
ال زەرتتەۋشى ايگەرىم قۇرالباي مىرجاقىپ دۋلاتۇلىنىڭ ەسەپ قۇرالدارىنىڭ قازاقستاندا جوق العاشقى باسىلىمدارى رەسەي ارحيۆتەرىنەن تابىلعانىن اتاپ ءوتتى.
"1914 جىلعى ءبىرىنشى جانە ەكىنشى جىلدىقتاردىڭ تۇپنۇسقا باسىلىمدارىن سول جەردەن الدىق. بىزدە تەك ساپاسى تومەن، تولىق ەمەس نۇسقالارى عانا بار ەدى", — دەيدى ول.
الداعى ۋاقىتتا جاس عالىمدار ومبى، باكۋ سياقتى عىلىمي-مادەني ورتالىقتارعا ەكسپەديتسيا جاساپ، الاش مۇراسىنا قاتىستى باسقا دا سيرەك كىتاپتاردىڭ ەسكى باسىلىمدارىن ىزدەستىرۋدى جوسپارلاپ وتىر.
ايتا كەتەيىك، 1937 جىلى 8 جەلتوقسان كۇنى ۇلت ۇستازى احمەت بايتۇرسىنۇلى اتىلعان. ول ستاليندىك رەپرەسسيا قۇربانى بولدى.
