كاليما ناۋشاباەۆا-ءبىر توعا، سالماقتى جان. پاراساتتىلىق پەن پايىمدىلىقتى بويىنا سىڭىرە بىلگەن كاليمانىڭ ونەرىنە كەلسەك، ول ءوزى بىرتوبە.
ەڭبەك جولىن ۇلى اكتەر، قر حالىق ءارتيسى ن.ءجانتورين اتىنداعى ماڭعىستاۋ وبلىستىق مۋزىكالىق دراما تەاترىنان باستاعان كاليما بۇگىنگى تاڭدا استانا مۋزىكالىق جاسكورەرمەندەر تەاترىنىڭ جەتەكشى اكتريسالارىنىڭ ءبىرى. ال ۇلكەن ونەر جولىنا قادامى تەمىربەك قاراۇلى جۇرگەنوۆ اتىنداعى قازاق ۇلتتىق ونەر اكادەمياسىندا بولات اتاباەۆ پەن اسحات ماەميروۆتىڭ شەبەرحاناسىنان كوشىن باستادى.
ۇلاعاتتى ۇستازداردىڭ ءار ءتالىمى، ءار ءسوزى كاليما ءۇشىن ونەگە بولدى. اكادەمياداعى 4 جىل زۋىلداپ ءوتىپ، بويداعى جالىن مەن ونەردەگى ماحابباتپەن كيەلى ماڭعىستاۋ وڭىرىنە سونداعى ن.ءجانتورين تەاترىنا قادام باسادى. اتالمىش ونەر وشاعىندا ۇلكەن مەكتەپتەن ءوتىپ، شىڭدالىپ، ەل استاناسىنا تالپىنىسپەن اتانادى. كەلىسىمەن، استانا مۋزىكالىق جاسكورەرمەندەر تەاترىنا جۇمىسقا قابىلدانادى. ەلوردالىق كورەرمەندەر كاليمانى د.يسابەكوۆتىڭ «گاۋحارتاس» مۋزىكالىق دراماسىنداعى-انا، ا.ءۆولوديننىڭ «قوشتاسقىم كەلمەيدى» دراماسىنداعى-بەيتانىس ايەل، م.وماروۆانىڭ ء«شامشى» ميۋزيكلىندەگى-روزا باعلانوۆا جانە تاعى دا باسقا رولدەرىمەن كورىپ ءجۇر. «گاۋحارتاس» مۋزىكالىق دراماسىنداعى كاليمانىڭ انا بەينەسى-جۇرەگى مەيىرىمگە تولى، وتباسىنىڭ بىرلىگىن ويلايتىن، اينالاعا جىلۋلىقپەن قارايتىن جان.
انا-كاليمادا-قازاق ايەلىنە ءتان ۇلاعاتتىق جاتىر. انا-كاليمادا اۋىل-ەلدى ارالاپ جۇرەتىن وسەك قۇمار ايەل ەمەس، كەرىسىنشە، شاڭىراق بىرلىگىن ويلايتىن ناعىز قازاق ايەلىنىڭ پاراساتتىلىعى جاتىر. اكتريسا كاليما ءوز شەبەرلىگى ارقىلى كەيىپكەرىن وسىلاي ەرەكشەلەندىرەدى. «قوشتاسقىم كەلمەيدى» دراماسى قازاق تەاترىنا قۇبىلىس الىپ كەلگەن قويىلىم ەكەنىن جاقسى بىلەمىز. ونداعى ءار سان قيلى تاعدىرى، سان ءتۇرلى وقيعالار كورەرمەندى ويلاندىرماي قويمايدى. ال اتالعان تۋىندىداعى بەيتانىس ايەل بولسا، كاليمانىڭ وزگەشە اكتەرلىك قىرىن اشقان ءرولى بولدى. بەيتانىس ايەل-اينالادان جىلۋلىق ىزدەپ جۇرگەن، ومىردەن ءوز ورىنىن تابا الماي جۇرگەن جان. ونىڭ ىشكى تراگەدياسىندا ء«ومىر» ايالداماسىندا ءوزىنىڭ اۆتوبۋسىن كۇتىپ جۇرگەن ايەل جاتىر. بىراق، بەيتانىس ايەل ول اۆتوبۋسىنىڭ قاشان كەلەتىنىن ءوزى دە، بىلمەيدى. اكتريسا بەيتانىس ايەلدى وسىلايشا قۇبىلتادى. كاليمانىڭ نۇسقالاۋىنداعى روزا باعلانوۆا-ونەر سۇيەر قاۋىمدى سۇيسىنتەتىن وبراز. كاليما-روزا باعلانوۆا-تەك قانا ونەر ادامى عانا ەمەس، سونداي-اق، ونەردەگى ءىزباسارلارىنا جاناشىر، شامشىگە تىلەۋلەس كىسى. ميۋزيكلدە روزا باعلانوۆانىڭ ءبىر عانا ساحناسى بار، سول ءبىر عانا ساحنادا روزا باعلانوۆانىڭ بولمىسىن كاليما ناۋشاباەۆا كورسەتە بىلەدى. كاليما-روزا باعلانوۆادا جالىندى جانارى، سىزىلعان داۋىسى، ءتىپتى، كيىم-كيىسىندەگى ەرەكشەلىك تە، قازاق ينتەلەگەنتسيا قىزدارىنىڭ تابيعاتى ايقىن كورىنەدى. كسرو حالىق ءارتيسى، قازاقتىڭ ۇلى اكتريساسى فاريدا ءشارىپوۆانىڭ: «اكتەرلىك كاسىپتىڭ ەڭ قيىندىعى – جانكەشتىلىگىندە. جانىڭنىڭ بارلىعىن سارپ ەتىپ، ءولىپ-تالعانىڭدا بارىپ شىنايى دۇنيە شىعاراسىڭ»-دەگەن قاناتتى ءسوزى بار. كاليما-جانكەشتى اكتريسا. كەيىپكەر بولمىسىن اشۋعا جانىن سالماي ەڭبەك ەتەدى. تالانتتى اكتريسانىڭ تايعىماس كەيىپكەرلەرىن كورۋگە تەاترعا اسىعايىق!\
