تاشكەنت قالاسىندا ورتالىق ازيا مەملەكەتتەرى مەن كورەيا رەسپۋبليكاسىنىڭ پارلامەنتتەرى سپيكەرلەرىنىڭ ءۇشىنشى كەزدەسۋى ءوتتى. ءىس-شاراعا ءماجىلىس توراعاسى ەرلان قوشانوۆ باستاعان قازاقستان پارلامەنتىنىڭ دەلەگاتسياسى قاتىستى.
«ادامي قادىر-قاسيەت، الەۋمەتتىك ادىلدىك پەن قورشاعان ورتانى قورعاۋ جولىنداعى ىنتىماقتاستىق» تاقىرىبىندا وتكەن فورۋمدا تاراپتار پارلامەنتارالىق ديالوگتى نىعايتۋ، تۇراقتى دامۋ، تسيفرلاندىرۋ، ەكولوگيا جانە الەۋمەتتىك ساياسات ماسەلەلەرىن تالقىلادى.
پلەنارلىق سەسسيادا ءسوز سويلەگەن ەرلان قوشانوۆ بۇل قۇندىلىقتاردىڭ قازاقستاندا جۇزەگە اسىرىلىپ جاتقان رەفورمالارمەن ۇندەس ەكەنىن اتاپ ءوتتى. ول جاس ۇرپاققا ينۆەستيتسيا سالۋ، ءبىلىم مەن عىلىم سالاسىنداعى ىنتىماقتاستىقتى كەڭەيتۋ، سونداي-اق جاساندى ينتەللەكت پەن تسيفرلىق تەحنولوگيالار بويىنشا بىرلەسكەن جوبالاردى دامىتۋ ماڭىزدى ەكەنىن ايتتى.
سونىمەن قاتار فورۋمدا ەكولوگيالىق كۇن ءتارتىبى، ارال تەڭىزىنىڭ ماسەلەسى، سۋ رەسۋرستارىنىڭ تاپشىلىعى جانە «جاسىل» ەنەرگەتيكانى دامىتۋ تاقىرىپتارى كوتەرىلدى. ءماجىلىس توراعاسى كورەيلىك ارىپتەستەرمەن ەكولوگيا سالاسىنداعى عىلىمي ىنتىماقتاستىقتى ارتتىرۋعا شاقىردى.
كەزدەسۋ قورىتىندىسى بويىنشا ورتالىق ازيا ەلدەرى مەن كورەيا رەسپۋبليكاسىنىڭ پارلامەنتتەرى سپيكەرلەرى بىرلەسكەن دەكلاراتسياعا قول قويدى. كەلەسى، ءتورتىنشى كەزدەسۋ 2026 جىلى قازاقستاندا وتەدى دەپ جوسپارلانىپ وتىر.
