الماتى – بانگكوك باعىتىنداعى ۇشاقتا جولاۋشىلار توبەلەس شىعارعان. وقيعانىڭ بەينەجازباسى الەۋمەتتىك جەلىدە تارادى، دەپ حابارلايدى «ادىرنا» ءتىلشىسى.
كادرلاردان ەر ادامداردىڭ ءبىر-بىرىنە سوققى جاساپ جاتقانىن، ال اينالاسىنداعىلاردىڭ جانجالدى توقتاتۋعا تىرىسقانىن كورۋگە بولادى. الەۋمەتتىك جەلىلەردەگى مالىمەتكە سايكەس، وقيعا Air Astana اۋە كومپانياسىنىڭ رەيسىندە بولعان.
بۇل وقيعاعا قاتىستى كولىك پوليتسياسى دەپارتامەنتىنىڭ ءباسپاسوز قىزمەتى تۇسىنىكتەمە بەردى.
«الماتى قالاسىنىڭ اۋەجايىندا الماتى – بانگكوك باعىتى بويىنشا ۇشاتىن اۋە كەمەسىنىڭ بورتىنان جەلىلىك پوليتسيا قىزمەتكەرلەرى ءتورت شەتەل ازاماتىن ءتۇسىردى. ولاردىڭ ەكەۋى ماس كۇيدە بولعان. ارالارىندا جانجال شىعىپ، توبەلەسكە ۇلاسقان»، – دەپ حابارلادى ۆەدومستۆو.
پوليتسيا مالىمەتىنشە، اۋە كەمەسىنىڭ بورتىندا بۇزاقىلىق ارەكەت جاساعانى ءۇشىن قىلمىستىق ءىس قوزعالعان. قۇقىق بۇزۋشىلاردىڭ ەكەۋى ۋاقىتشا ۇستاۋ يزولياتورىنا قامالعان.
«قر قىلمىستىق-پروتسەستىك كودەكسىنىڭ 201-بابىنا سايكەس وزگە اقپارات جاريالانبايدى»، – دەپ ناقتىلادى پوليتسيا.
