تەڭىز كەن ورنىندا مۇناي ءوندىرۋ تاعى 7–10 كۇنگە ۋاقىتشا توقتاتىلادى. بۇل تۋرالى Reuters اگەنتتىگى جازدى، دەپ حابارلايدى «ادىرنا» ءتىلشىسى.
شەتەلدىك باق مالىمەتىنشە، بۇل كاسپي قۇبىر كونسورتسيۋمى جۇيەسى ارقىلى ەكسپورتتالاتىن مۇناي كولەمىنىڭ قىسقارۋىنا اكەلەدى.
18 قاڭتاردا «تەڭىزشەۆرويل» كومپانياسى كەشەندە ءورت شىعۋىنا بايلانىستى تەڭىز جانە كورولەۆسكوە كەن ورىندارىندا مۇناي ءوندىرۋ ۋاقىتشا توقتاتىلعانىن مالىمدەگەن ەدى. Reuters ساقتىق شارالارىنىڭ ۇزاققا سوزىلۋى مۇمكىن ەكەنىندىگىن جازدى.
تەڭىزدەگى مۇناي ءوندىرۋدى توقتاتۋ كەم دەگەندە وسى اپتانىڭ سوڭىنا دەيىن سوزىلۋى مۇمكىن، الايدا ءۇزىلىس ودان دا ۇزاققا، اقپان ايىنا دەيىن جالعاسۋى ىقتيمال»، — دەيدى اگەنتتىك دەرەككوزدەرىنىڭ ءبىرى.
Reuters مالىمەتىنشە، تشو قارا تەڭىزدەگى كقك تەرمينالىنان قاڭتار جانە اقپان ايلارىندا جونەلتىلۋى ءتيىس CPC Blend ماركالى مۇنايدىڭ شامامەن 600–700 مىڭ توننا كولەمىندەگى بەس ەكسپورتتىق پارتياسىن جونەلتۋدەن باس تارتقان.
ەسكە سالايىق، بۇعان دەيىن كومپانيا وكىلدەرى وقيعانىڭ سالدارىن مۇمكىندىگىنشە تەزىرەك جويۋعا كۇش سالىپ جاتقانىن جانە تەرىس اسەرلەردى ازايتۋ ءۇشىن مەملەكەتتىك ورگاندارمەن تىعىز بايلانىستا جۇمىس ىستەپ وتىرعانىن ايتقان ەدى.
