يراندا 17 اقپان كۇنى بيلىككە قارسى نارازىلىقتار كەزىندە قازا تاپقانداردىڭ قىرقى ءوتتى. بىرنەشە قالادا جيىندار ۇيىمداستىرىلىپ، كەي جەرلەردە قاقتىعىستار بولدى. بۇل تۋرالى AFP اگەنتتىگى جازدى، دەپ حابارلايدى «ادىرنا» ءتىلشىسى.
ابادان قالاسىندا شەرۋشىلەر قولدارىنا گۇلدەر مەن قازا تاپقانداردىڭ سۋرەتتەرىن ۇستاپ، «حامەنەيعا ءولىم!»، «شاح جاساسىن!» دەپ ۇرانداتتى. الەۋمەتتىك جەلىلەردە تاراعان باسقا بەينەجازبالاردا وق اتىلعان كەزدە حالىقتىڭ دۇرلىگىپ، جان-جاققا قاشقانى كورىنەدى.
مەشحەدتە جينالعاندار ء«بىر ادام ءولدى، مىڭداعان ادام ونىڭ ارتىندا تۇر» دەپ ۇرانداتقان.
يران بيلىگى تەگەرانداعى يمام حومەيني مەشىتىندە رەسمي ەسكە الۋ ءراسىمىن وتكىزدى. قاتىسۋشىلار يران جالاۋلارىن كوتەرىپ، مارقۇمداردىڭ پورترەتتەرىن ۇستاپ، «امەريكاعا ءولىم!» جانە «يزرايلگە ءولىم!» دەگەن ۇراندار ايتتى.
شارادا جوعارى لاۋازىمدى تۇلعالار، سونىڭ ىشىندە ۆيتسە-پرەزيدەنت مۇحامماد رەزا ارەف پەن يسلام رەۆوليۋتسياسى ساقشىلار كورپۋسىنىڭ قولباسشىسى ەسمايل كااني ءسوز سويلەدى. كااني «تارتىپسىزدىك ۇيىمداستىرۋشىلاردى قولداعاندار قىلمىسكەر سانالادى جانە جاۋاپكەرشىلىككە تارتىلادى» دەپ مالىمدەدى.
يرانداعى العاشقى نارازىلىقتار 2025 جىلدىڭ جەلتوقسانىندا ەكونوميكالىق سەبەپتەرمەن باستالعان. كەيىن ولار ساياسي سيپات الىپ، بۇكىل ەلگە تارادى. بيلىك شەرۋلەردى كۇشپەن باسۋعا تىرىسىپ، ينتەرنەت پەن ءموبيلدى بايلانىستى بۇعاتتاعان.
سىرتقى ىستەر ءمينيسترى ابباس اراگچي 23 قاڭتاردا نارازىلىقتار كەزىندە جالپى 3117 ادامنىڭ قازا تاپقانىن ايتتى. ونىڭ ىشىندە 2427-ءسى بەيبىت تۇرعىندار مەن قاۋىپسىزدىك قىزمەتكەرلەرى، ال قالعاندارىن مينيستر «تەرروريستەر» دەپ اتادى.
ال تاۋەلسىز قۇقىق قورعاۋ ۇيىمدارى باسقا مالىمەت كەلتىرەدى. اقش-تا ورنالاسقان HRANA اگەنتتىگىنىڭ دەرەگىنشە، قازا تاپقاندار سانى 7000-نان اسادى جانە ولاردىڭ باسىم بولىگى – نارازىلىققا شىققان ازاماتتار.
