جامبىل وبلىسىندا مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسىرىلىپ جاتقان «تازا قازاقستان» تۇجىرىمداماسى اياسىندا ء«مولدىر بۇلاق» ەكولوگيالىق اكتسياسى ۇيىمداستىرىلدى. تاعىلىمى تەرەڭ رەسپۋبليكالىق باستاما ناۋرىزناما ونكۇندىگىنىڭ «تازارۋ كۇنىمەن» تۇسپا-تۇس كەلىپ، ءوز ءمانىن ودان ءارى ايشىقتاي ءتۇستى.
ءىس-شارانى سۋ رەسۋرستارى جانە يرريگاتسيا مينيسترلىگى مەن جامبىل وبلىسى اكىمدىگى وتكىزدى.
ەكولوگيالىق اكتسيانىڭ باستى ماقساتى – تابيعي سۋ كوزدەرىن قورعاۋ، بۇلاقتار مەن وزەن-كولدەردى قوقىستان تازارتۋ، سونداي-اق جاستاردىڭ بويىندا تابيعاتقا جاناشىرلىق پەن ەكولوگيالىق مادەنيەتتى قالىپتاستىرۋ.
اكتسيا اياسىندا جامبىل وبلىسىنىڭ اكىمى ەربول قاراشوكەەۆ پەن سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ جامبىل اۋدانىنداعى جالعىزتال بۇلاعىنىڭ كوزىن اشىپ، اۋماقتى اباتتاندىرۋ جانە كوگالداندىرۋ جۇمىستارىن جۇرگىزدى.
يگى ىسكە ءوڭىر جاستارى بەلسەندى اتسالىستى. اسىرەسە، مينيسترلىكتىڭ باستاماسىمەن جامبىل وبلىسىندا العاش رەت قۇرىلعان «بولاشاقتىڭ قاينارى» ەرىكتىلەر قوزعالىسى ەرەكشە بەلسەندىلىك تانىتتى. بۇل قوزعالىس قاتارىنا قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتى ستۋدەنتتەرى دە قوسىلىپ، تابيعاتتى قورعاۋ باعىتىنداعى جۇمىستارعا ۇلەس قوستى.
نۇرجان نۇرجىگىتوۆ ءوز سوزىندە ەرىكتىلەردىڭ قوعامداعى ءرولىن ەرەكشە اتاپ ءوتتى. ونىڭ ايتۋىنشا، «بولاشاقتىڭ قاينارى» باستاماسى – ەلىمىزدەگى سۋ سالاسىنا باعىتتالعان العاشقى ەرىكتىلەر قوزعالىسى. بۇل جوبانىڭ جامبىل وڭىرىنەن باستاۋ الۋى تاراز قالاسىندا قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتىنىڭ اشىلۋىمەن تىعىز بايلانىستى. الداعى ۋاقىتتا يگى باستاما رەسپۋبليكا كولەمىندە جالعاسىن تابادى.
ءوز كەزەگىندە ءوڭىر باسشىسى بۇلاقتىڭ كوزىن اشۋ – اتا-بابادان جەتكەن اسىل امانات ەكەنىن باسا ايتتى.
– قازاقتا «بۇلاق كورسەڭ، كوزىن اش» دەگەن دانا ءسوز بار. ويتكەنى بۇلاق – تىرشىلىكتىڭ باستاۋى، ءومىردىڭ ءنارى. ونىڭ ءمولدىر سۋى – تابيعاتتىڭ بىزگە تارتۋ ەتكەن ەڭ اسىل سىيى. سوندىقتان بۇلاقتىڭ كوزىن اشىپ، اينالاسىن رەتكە كەلتىرۋ – ءاربىر ازاماتتىڭ ورتاق پارىزى.
«تازا قازاقستان» باستاماسى ەل ومىرىندەگى ماڭىزدى قاعيداتتاردىڭ بىرىنە اينالىپ وتىر. مەملەكەت باسشىسى ايتقانداي، تازالىق – ءار ادامنان، ءار ۇيدەن، ءار كوشە مەن ءار قالادان باستالۋى ءتيىس. سەبەبى بۇل – ءبىر كۇندىك شارا ەمەس، بۇل – ءبىزدىڭ ءومىر سالتىمىز. وسى يگى ىسكە ۇلەس قوسىپ جۇرگەن بارشا ازاماتقا شىنايى العىسىمدى بىلدىرەمىن! – دەدى ەربول قاراشوكەەۆ.
شارا بارىسىندا وبلىستىق ارداگەرلەر كەڭەسىنىڭ توراعاسى ەركىمبەك سولتىباەۆ اق باتاسىن بەردى. بەكبولات ورىنبەكوۆ پەن سۋ سالاسىنىڭ ارداگەرى بەرىك نۇراليەۆ اكتسيانىڭ قوعام مەن جاستار تاربيەسىندەگى ماڭىزىنا ەرەكشە توقتالدى.
ايتا كەتەيىك، ء«مولدىر بۇلاق» اكتسياسى جامبىل وبلىسىنىڭ بارلىق اۋداندارىندا جالعاسىن تاۋىپ، كەڭ اۋقىمدا وتكىزىلدى.
