Jambyl oblysynda Memleket basşysy Qasym-Jomart Toqaevtyŋ bastamasymen jüzege asyrylyp jatqan «Taza Qazaqstan» tūjyrymdamasy aiasynda «Möldır būlaq» ekologiialyq aksiiasy ūiymdastyryldy. Taǧylymy tereŋ respublikalyq bastama Nauryznama onkündıgınıŋ «Tazaru künımen» tūspa-tūs kelıp, öz mänın odan ärı aişyqtai tüstı.
Is-şarany Su resurstary jäne irrigasiia ministrlıgı men Jambyl oblysy äkımdıgı ötkızdı.
Ekologiialyq aksiianyŋ basty maqsaty – tabiǧi su közderın qorǧau, būlaqtar men özen-kölderdı qoqystan tazartu, sondai-aq jastardyŋ boiynda tabiǧatqa janaşyrlyq pen ekologiialyq mädeniettı qalyptastyru.
Aksiia aiasynda Jambyl oblysynyŋ äkımı Erbol Qaraşökeev pen Su resurstary jäne irrigasiia ministrı Nūrjan Nūrjıgıtov Jambyl audanyndaǧy Jalǧyztal būlaǧynyŋ közın aşyp, aumaqty abattandyru jäne kögaldandyru jūmystaryn jürgızdı.
İgı ıske öŋır jastary belsendı atsalysty. Äsırese, ministrlıktıŋ bastamasymen Jambyl oblysynda alǧaş ret qūrylǧan «Bolaşaqtyŋ qainary» erıktıler qozǧalysy erekşe belsendılık tanytty. Būl qozǧalys qataryna Qazaq ūlttyq su şaruaşylyǧy jäne irrigasiia universitetı studentterı de qosylyp, tabiǧatty qorǧau baǧytyndaǧy jūmystarǧa üles qosty.
Nūrjan Nūrjıgıtov öz sözınde erıktılerdıŋ qoǧamdaǧy rölın erekşe atap öttı. Onyŋ aituynşa, «Bolaşaqtyŋ qainary» bastamasy – elımızdegı su salasyna baǧyttalǧan alǧaşqy erıktıler qozǧalysy. Būl jobanyŋ Jambyl öŋırınen bastau aluy Taraz qalasynda Qazaq ūlttyq su şaruaşylyǧy jäne irrigasiia universitetınıŋ aşyluymen tyǧyz bailanysty. Aldaǧy uaqytta igı bastama respublika kölemınde jalǧasyn tabady.
Öz kezegınde öŋır basşysy būlaqtyŋ közın aşu – ata-babadan jetken asyl amanat ekenın basa aitty.
– Qazaqta «Būlaq körseŋ, közın aş» degen dana söz bar. Öitkenı būlaq – tırşılıktıŋ bastauy, ömırdıŋ närı. Onyŋ möldır suy – tabiǧattyŋ bızge tartu etken eŋ asyl syiy. Sondyqtan būlaqtyŋ közın aşyp, ainalasyn retke keltıru – ärbır azamattyŋ ortaq paryzy.
«Taza Qazaqstan» bastamasy el ömırındegı maŋyzdy qaǧidattardyŋ bırıne ainalyp otyr. Memleket basşysy aitqandai, tazalyq – är adamnan, är üiden, är köşe men är qaladan bastaluy tiıs. Sebebı būl – bır kündık şara emes, būl – bızdıŋ ömır saltymyz. Osy igı ıske üles qosyp jürgen barşa azamatqa şynaiy alǧysymdy bıldıremın! – dedı Erbol Qaraşökeev.
Şara barysynda oblystyq ardagerler keŋesınıŋ töraǧasy Erkımbek Soltybaev aq batasyn berdı. Bekbolat Orynbekov pen su salasynyŋ ardagerı Berık Nūraliev aksiianyŋ qoǧam men jastar tärbiesındegı maŋyzyna erekşe toqtaldy.
Aita keteiık, «Möldır būlaq» aksiiasy Jambyl oblysynyŋ barlyq audandarynda jalǧasyn tauyp, keŋ auqymda ötkızıldı.
