يران بيلىگى اقش پرەزيدەنتى دونالد ترامپ جاريالاعان ۋلتيماتۋمعا قاتاڭ جاۋاپ قايتاردى. بۇل تۋرالى يراندىق جوعارى لاۋازىمدى تۇلعالار مالىمدەدى، دەپ حابارلايدى “ادىرنا”.
4 ساۋىردە دونالد ترامپ يرانعا قويىلعان تالاپتاردى ورىنداۋ ءۇشىن بەرىلگەن ۋاقىتتىڭ اياقتالۋىنا 48 ساعات قالعانىن ەسكە سالدى. ونىڭ ايتۋىنشا، ەگەر تەگەران ۇسىنىلعان شارتتارعا كەلىسپەسە، وندا اقش تاراپىنان جويقىن اسكەري ارەكەتتەر بولۋى مۇمكىن. اق ءۇي باسشىسى Truth Social جەلىسىندە يرانعا كەلىسىم جاساۋ نەمەسە ورمۋز بۇعازىن اشۋ ءۇشىن بۇرىن ون كۇن ۋاقىت بەرىلگەنىن اتاپ ءوتتى.
الايدا تەگەران بۇل تالاپتاردى قابىلداماي، ۆاشينگتونعا قارسى قاتاڭ مالىمدەمە جاسادى. يران پارلامەنتىنىڭ ۇلتتىق قاۋىپسىزدىك جانە سىرتقى ساياسات كوميتەتىنىڭ توراعاسى ەبراحيم ازيزي الەۋمەتتىك جەلىدە اقش باسشىسىنا قاتاڭ ەسكەرتۋ جاريالادى.
"يران سەنى دە، ساربازدارىڭدى دا توزاقتىڭ تۇبىنە جىبەرەدى. سەندەرگە لايىق ورىن سول", - دەپ جازدى X الەۋمەتتىك جەلىسىندە يران پارلامەنتىنىڭ ۇلتتىق قاۋىپسىزدىك جانە سىرتقى ساياسات كوميتەتىنىڭ توراعاسى ەبراحيم ازيزي.
سونىمەن قاتار، يراننىڭ جوعارى اسكەري باسشىلىعىنىڭ وكىلى گەنەرال ءالي ابدوللاحي اليابادي دونالد ترامپتى «اگرەسسيۆ ءارى سوعىسقۇمار» دەپ سيپاتتاپ، اقش تاراپىنان قانداي دا ءبىر شابۋىل جاسالعان جاعدايدا جاۋاپ قاتال بولاتىنىن جەتكىزدى. ونىڭ سوزىنشە، مۇنداي جاعدايدا امەريكالىقتار ءۇشىن «توزاق قاقپاسى اشىلادى».
ايتا كەتەيىك، بۇعان دەيىن دە، 22 ناۋرىزعا قاراعان ءتۇنى دونالد ترامپ يرانعا 48 ساعاتتىق ۋلتيماتۋم جاريالاعان بولاتىن. ول كەزدە دە نەگىزگى تالاپتاردىڭ ءبىرى – ورمۋز بۇعازى ارقىلى قوزعالىسقا قويىلعان شەكتەۋلەردى الىپ تاستاۋ ەدى. تالاپ ورىندالماعان جاعدايدا يراننىڭ ەنەرگەتيكالىق ينفراقۇرىلىمىنا سوققى بەرۋ مۇمكىندىگى ايتىلعان.
كەيىنىرەك اقش تاراپى كەلىسسوزدەر بارىسىنا بايلانىستى بۇل مەرزىمدى بىرنەشە رەت كەيىنگە شەگەرگەن. قازىرگى تاڭدا تاراپتار اراسىنداعى شيەلەنىس ءالى دە جوعارى دەڭگەيدە قالىپ وتىر.
