دونالد ترامپ باستاعان امەريكالىق دەلەگاتسيا قىتايدان ۇشار الدىندا قاۋىپسىزدىك ماقساتىندا مەملەكەتتىك ساپار كەزىندە پايدالانىلعان بارلىق قىتايلىق گادجەتتەر مەن رۇقساتنامالاردى قوقىسقا تاستاعان، دەپ حابارلايدى "ادىرنا" ۇلتتىق پورتالى.
بۇل تۋرالى امەريكالىق جۋرناليست ەميلي گۋدين حابارلادى.
ءجۋرناليستىڭ مالىمەتىنشە، اق ءۇي قىزمەتكەرلەرى ۇشاققا مىنەر الدىندا دەلەگاتسيا مۇشەلەرىنىڭ بەيدجدەرىن، ءبىر رەتتىك تەلەفوندارىن جانە قىتايدا قولدانىلعان قۇرىلعىلارىن جيناپ، تراپ ماڭىنداعى قوقىس جاشىگىنە تاستاعان.
«قىتايدا وندىرىلگەن ەشقانداي زات ۇشاق بورتىنا كىرگىزىلمەيدى. ءبىز جاقىن ارادا امەريكاعا ۇشامىز»، — دەلىنگەن جاريالانىمدا.
مۇنداي قادام قىتايدىڭ كيبەرشپيوناج سالاسىنداعى بەدەلىنە بايلانىستى قاۋىپسىزدىك شارالارىن كۇشەيتۋ ماقساتىندا جاسالعانى ايتىلدى. اقش تاراپى ەلگە ورالعاننان كەيىن قانداي دا ءبىر باقىلاۋ قۇرىلعىلارى نەمەسە اقپاراتتىق قاۋىپ ءتوندىرۋى مۇمكىن تەحنيكالاردىڭ بورتقا وتۋىنە جول بەرمەۋدى كوزدەگەن.
سونىمەن قاتار بۇل قاتاڭ قاۋىپسىزدىك شارالارى قىتايداعى رەسمي ساپاردىڭ سالتاناتتى ديپلوماتيالىق اتموسفەراسىمەن قاراما-قايشى بولعانى اتاپ ءوتىلدى.
بۇعان دەيىن سي تسزينپين مەن دونالد ترامپتىڭ بەيجىڭدەگى كەزدەسۋى كەزىندە ءتۇسىرىلىم توبى مەن كۇزەت قىزمەتى اراسىندا جانجال شىققانى حابارلانعان ەدى. وقيعا كەلىسسوزدەر باستالار الدىندا كونفەرەنتس-زالدا بولعان. الايدا ەكى ەل باسشىسى بۇل جاعدايعا ارالاسپاعان.
