اقتوبەدە سىنىقشى ءارى ەمشى رەتىندە تانىمال باعداگۇل لەپەسوۆاعا قاتىستى تەكسەرۋ باستالدى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
مالىمەتكە سايكەس، اقتوبە وبلىسى بويىنشا ەكونوميكالىق تەرگەپ-تەكسەرۋ دەپارتامەنتى ونىڭ قارجىلىق اۋدارىمدارىنا بايلانىستى مونيتورينگ جۇرگىزىپ جاتىر.
"قازىرگى ۋاقىتتا بىزدە تولىق اقپارات جوق، ءتيىستى تەكسەرۋ جانە مونيتورينگ جۇمىستارى جۇرگىزىلۋدە", – دەپ حابارلادى ۆەدومستۆونىڭ ءباسپاسوز قىزمەتى.
باعداگۇل لەپەسوۆا توڭىرەگىندەگى داۋ ونىڭ تەلەجۇرگىزۋشى دينارا ءساتجان تۋرالى ايتقان پىكىرلەرىنەن كەيىن ورشىگەن. وسىدان كەيىن جۋرناليست پوليتسيا مەن ەكونوميكالىق تەرگەپ-تەكسەرۋ دەپارتامەنتىنە جۇگىنەتىنىن مالىمدەگەن بولاتىن. ونىڭ ايتۋىنشا، ەمشى ءوزىن بالاعاتتاعان.
سونىمەن قاتار تەلەجۇرگىزۋشى ەمشىنىڭ اقىلى قىزمەت كورسەتۋىنىڭ زاڭدىلىعى، بيولوگيالىق بەلسەندى قوسپالار (باد) ساتۋى، «باتا بەرۋ» قىزمەتتەرى، ءتۇرلى ساۋىقتىرۋ تاجىريبەلەرى جانە سالىق تولەۋ ماسەلەسىن كوتەرگەن.
ءوز كەزەگىندە باعداگۇل لەپەسوۆا الەۋمەتتىك جەلىدە مالىمدەمە جاساپ، وزىنە قازاقستاننان عانا ەمەس، كورشى ەلدەردەن دە قولداۋ كورسەتىلىپ جاتقانىن ايتتى.
"مەنىڭ ءار ءسوزىم – حالىقتىڭ جانايقايى. قوعامدا وتباسىلىق ماسەلەلەر كوبەيىپ بارادى. ادامدار قيىندىقتان كەيىن باقىت ىزدەيدى، بىراق ءتۇرلى جاعدايلار وتباسىلاردىڭ بۇزىلۋىنا سەبەپ بولىپ جاتىر", – دەدى ول.
قازىرگى ۋاقىتتا اتالعان ماسەلەگە بايلانىستى رەسمي تەكسەرۋ جالعاسىپ جاتىر.
