الماتى قالاسىنىڭ المالى اۋداندىق سوتى قازتاگ اگەنتتىگىنىڭ باس رەداكتورى ءامىر قاسەنوۆتىڭ ۇيقاماقتان بوساتىلعانى تۋرالى اقپاراتتى جوققا شىعاردى، دەپ حابارلايدى «ادىرنا» ءتىلشىسى.
سوتتىڭ ءباسپاسوز قىزمەتىنىڭ مالىمەتىنشە، بۇقارالىق اقپارات قۇرالدارى مەن الەۋمەتتىك جەلىلەردە قاسەنوۆكە قاتىستى بۇلتارتپاۋ شاراسىنىڭ مەرزىمى اياقتالعانى جونىندە تاراعان اقپارات شىندىققا سايكەس كەلمەيدى.
«قازاقستان رەسپۋبليكاسى قىلمىستىق-پروتسەستىك كودەكسىنىڭ 319-بابىنا سايكەس قىلمىستىق ءىس سوتقا كەلىپ تۇسكەن كەزدە سۋديا بۇلتارتپاۋ شاراسى ماسەلەسىن قارايدى. وسى ءىس بويىنشا سوت 5 ماۋسىم كۇنى بۇرىن تاڭدالعان ۇيقاماق تۇرىندەگى بۇلتارتپاۋ شاراسىن وزگەرىسسىز قالدىرۋ تۋرالى شەشىم قابىلدادى»، – دەلىنگەن حابارلامادا.
وسىعان بايلانىستى سوت قاسەنوۆتىڭ بۇلتارتپاۋ شاراسىنىڭ مەرزىمى اياقتالدى دەگەن مالىمدەمەلەرى سوت اكتىسىنىڭ مازمۇنىنا قايشى كەلەتىنىن اتاپ ءوتتى.
سونداي-اق سوت قاۋلىلارى پروتسەسكە قاتىسۋشىلار مەن ولاردىڭ قورعاۋشىلارىنا قولجەتىمدى «سوت كابينەتى» اقپاراتتىق جۇيەسىندە ورنالاستىرىلاتىنى ەسكەرتىلدى. زاڭعا سايكەس، تاراپتار سوت اكتىلەرىمەن بەلگىلەنگەن ءتارتىپ بويىنشا تانىسا الادى. ودان بولەك، سوتتىڭ ءباسپاسوز قىزمەتى جۇكتەلگەن شەكتەۋلەر مەن مىندەتتەر بۇزىلعان جاعدايدا سوت بۇلتارتپاۋ شاراسىن قاتاڭداتۋعا قۇقىلى ەكەنىن دە مالىمدەدى.
