قارجى ۆيتسە-ءمينيسترى اسەت تۇرىسوۆ 15 ماۋسىم كۇنى وكق-دا وتكەن بريفينگ بارىسىندا تسيفرلىق تەڭگە قانداي سالالاردا قولدانىلاتىنىن ايتتى، دەپ حابارلايدى “ادىرنا”.
ۆيتسە-مينيستر 2025 جىلى ۇلتتىق بانكپەن بىرلەسىپ مەملەكەتتىك ساتىپ الۋ، ينفراقۇرىلىمدىق جوبالار، سۋبسيديالاۋ جانە سالىقتىق اكىمشىلەندىرۋدى قوسا العاندا، ءتۇرلى باعىتتار بويىنشا 20-عا جۋىق پيلوتتىق جوبا ىسكە قوسىلعانىن ەسكە سالدى.
"بۇل پيلوتتىق جوبالار جاقسى ناتيجە كورسەتتى. وسىعان بايلانىستى بۇگىن ۇلتتىق بانك پەن ۇكىمەت تسيفرلىق تەڭگەنى كوپتەپ شىعارۋ جوسپارىن بەكىتتى. نورماتيۆتىك-قۇقىقتىق جاعى دا بەكىتىلدى. بۇل - رەسمي تۇردە قازاقستانداعى ءۇشىنشى ۆاليۋتا", - دەدى ۆيتسە-مينيستر.
ونىڭ ايتۋىنشا، ۆاليۋتانى كەزەڭ-كەزەڭىمەن ەنگىزۋ جوسپارلانۋدا. ول بيۋدجەت قاراجاتىنىڭ جۇمسالۋىن باقىلاۋ ءۇشىن ەنگىزىلەدى.
"بۇل - قولما-قول اقشا جانە قولما-قول اقشاسىز اقشامەن قاتار جۇرەتىن ۇلتتىق ۆاليۋتانىڭ ءۇشىنشى ءتۇرى. بۇگىنگى تاڭدا تسيفرلىق تەڭگە پلاتفورماسىنىڭ مارتەبەسى جانە ونىڭ جۇمىس ىستەۋ ءتارتىبى زاڭنامالىق تۇردە بەكىتىلگەن. اينالىمعا شامامەن 339 ملرد تسيفرلىق تەڭگە شىعارىلدى. 20-دان استام پيلوتتىق جوبا ىسكە اسىرىلدى. تسيفرلىق تەڭگەنى قولدانۋ بيۋدجەت قاراجاتىنىڭ اشىقتىعى مەن پايدالانىلۋىن باقىلاۋدى ارتتىرۋعا، ولاردىڭ نىسانالى جۇمسالۋىن قامتاماسىز ەتۋگە مۇمكىندىك بەرەدى", – دەدى ۆيتسە-مينيستر.
