استانادا جوعارى وقۋ ورىندارىنىڭ ءبىرىنىڭ قىزمەتكەرى تالاپكەرلەردى زاڭسىز جولمەن وقۋعا تۇسىرەمىن دەپ الداپ، 18 ازاماتتان اقشا العانى ءۇشىن 3 جىل 6 ايعا باس بوستاندىعىنان ايىرىلدى، دەپ حابارلايدى "ادىرنا" ۇلتتىق پورتالى.
تەرگەۋ جانە سوت ماتەريالدارىنا سايكەس، سوتتالعان ازامات ۋنيۆەرسيتەتكە قابىلداۋعا «كومەكتەسەمىن» دەگەن جەلەۋمەن قىلمىستىق سحەما ۇيىمداستىرعان. ول جالعان مورلەر مەن قولدان جاسالعان قۇجاتتاردى پايدالانىپ، تالاپكەرلەردىڭ سەنىمىنە كىرىپ، ولاردى بەلگىلەنگەن قابىلداۋ راسىمىنەن تىس جوعارى وقۋ ورنىنا وقۋعا تۇسىرە الاتىنىن ايتىپ سەندىرگەن
وسىلايشا 18 تالاپكەردەن ارقايسىسىنان 600 مىڭنان 900 مىڭ تەڭگەگە دەيىن اقشا الىپ، زاڭسىز يەمدەنگەن.
باستى سوت تالقىلاۋى بارىسىندا مەملەكەتتىك ايىپتاۋشى سوتتالۋشىنىڭ قىزمەتتىك جاعدايىن پايدالانا وتىرىپ بىرنەشە رەت الاياقتىق جاساعانىن، سونداي-اق جالعان رەسمي قۇجاتتار مەن مورلەر دايىنداپ، پايدالانعانىن دالەلدەدى.
سوت ۇكىمىمەن ايىپتالۋشى 3 جىل 6 اي مەرزىمگە باس بوستاندىعىنان ايىرىلدى. ۇكىم زاڭدى كۇشىنە ەنگەن. سونىمەن قاتار قىلمىستىق ارەكەتتەن كەلتىرىلگەن ماتەريالدىق زالال سوتتالعان ازاماتتان ءوندىرىلدى.
پروكۋراتۋرا ازاماتتاردى ساق بولۋعا شاقىرىپ، جوعارى وقۋ ورىندارىنا ءتۇسۋ ماسەلەلەرى بويىنشا تەك رەسمي اقپارات كوزدەرىنە جانە ءبىلىم بەرۋ ۇيىمدارىنىڭ زاڭدى قابىلداۋ راسىمدەرىنە عانا جۇگىنۋگە كەڭەس بەردى.
