ازەربايجان مينيسترلىگى يزرايل ۇكىمەتىنىڭ 1915 جىلعى وقيعالاردى «ارميان گەنوتسيدى» رەتىندە تانۋ تۋرالى شەشىمىنە الاڭداۋشىلىق ءبىلدىرىپ، تەل-ءاۆيۆتى شەشىمدى قايتا قاراۋعا شاقىردى، دەپ حابارلايدى "ادىرنا" ءتىلشىسى.
ۆەدومستۆونىڭ مالىمدەۋىنشە، 1915 جىلعى وقيعالارعا قاتىستى تاريحي فاكتىلەردى بۇرمالاۋ جانە كۇردەلى تاريحي ۇدەرىستەردى قۇقىقتىق ءارى عىلىمي نەگىزدەردەن تىس ساياسي شەشىمگە اينالدىرۋعا جول بەرۋگە بولمايدى.
«مۇنداي قادامدار تاتۋلاسۋ مەن ءوزارا تۇسىنىستىكتى نىعايتپايدى. كەرىسىنشە، قالىپتاسقان قايشىلىقتاردى تەرەڭدەتىپ، وڭىردە تۇراقتى بەيبىتشىلىك پەن كەلىسىمدى قامتاماسىز ەتۋگە باعىتتالعان كۇش-جىگەرگە كەدەرگى كەلتىرەدى»، – دەلىنگەن ازەربايجان سىرتقى ىستەر مينيسترلىگىنىڭ مالىمدەمەسىندە.
رەسمي باكۋ تاريحي شىندىقتى قورعاۋ جانە حالىقارالىق قۇقىق قاعيداتتارىن قۇرمەتتەۋ ۇستانىمىن الداعى ۋاقىتتا دا دايەكتى تۇردە جالعاستىراتىنىن اتاپ ءوتتى.
سونىمەن قاتار، تۇركيا سىرتقى ىستەر مينيسترلىگى دە ءيزرايلدىڭ شەشىمىن قابىلدامايتىنىن مالىمدەدى. رەسمي انكارا بۇل شەشىمدى «قاساقانا جاسالعان قادام» دەپ باعالاپ، ونى پالەستينالىقتارعا قاتىستى ارەكەتتەرگە بايلانىستى ايتىلىپ جاتقان ايىپتاۋلاردان نازاردى باسقا جاققا بۇرۋ ارەكەتى دەپ اتادى.
