قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ قۇرىلتايشىلىعىمەن جۇمىس ىستەگەن "ەلباسى قورى" رەسمي تۇردە تاراتىلدى. بۇل تۋرالى جۋرناليست دميتري شيشكين جازدى، دەپ حابارلايدى "ادىرنا".
ءجۋرناليستىڭ جازۋىنشا، 2022 جىلعى قاڭتار وقيعاسىنان كەيىن بىرقاتار حالىقارالىق زەرتتەۋلەردە نازارباەۆتىڭ شامامەن 8 ملرد دوللارلىق اكتيۆتەردى وزىنە قاراستى قورلار جۇيەسى ارقىلى باسقاراتىنى ايتىلعان. اتالعان اكتيۆتەردىڭ قاتارىندا بانكتەر، قوناقۇيلەر مەن مەديا كومپانيالار بولعان. كوممەرتسيالىق ەمەس ۇيىم مارتەبەسىنە بايلانىستى بۇل مۇلىك ەكس-پرەزيدەنتتىڭ جەكە مەنشىگى رەتىندە تىركەلمەگەنىمەن، زاڭ بويىنشا قوردىڭ قۇرىلتايشىسى اكتيۆتەردىڭ تاعدىرىنا قاتىستى تۇپكىلىكتى شەشىم قابىلداي الادى.
قازىرگى ۋاقىتتا نۇرسۇلتان نازارباەۆتىڭ قۇرىلتايشىلىعى كورسەتىلگەن ەكى جەكە قور قالعان. ولار – "بايتاۋ" دامۋ قورى مەن "نۇرسۇلتان نازارباەۆ قورى". ال "نازارباەۆ قورىنىڭ" قۇرىلتايشىسى تۋرالى مالىمەت 2023 جىلدىڭ قاراشا ايىنان بەرى ەلەكتروندى ۇكىمەت پورتالىندا جاريالانبايدى.
رەسمي دەرەكتەرگە سايكەس، "ەلباسى قورى" 2025 جىلدىڭ 9 ماۋسىمىندا جۇمىسىن توقتاتقان. بۇعان دەيىن قوردىڭ توعىز ەنشىلەس كاسىپورنى بولعان. ونىڭ ءبىر بولىگى 2023–2024 جىلدارى جاڭا قۇرىلتايشىلاردىڭ قاراماعىنا وتكەن.
ماسەلەن، Almaty Building Service كومپانياسى Astana Art Fund جەكە قورىنا بەرىلگەن. ال Capital Invest 2021, Capital Invest Developer جانە Smart Investments سەرىكتەستىكتەرى "بايتاۋ" دامۋ قورىنىڭ باسقارۋىنا وتكەن. سونىمەن قاتار EBF Finance ۇيىمى باسقا قورعا تاپسىرىلسا، بىرقاتار اكتيۆتەر وزگە كومپانيالار مەن قورلاردىڭ يەلىگىنە وتكەن.
ايتا كەتەيىك، 2025 جىلدىڭ اقپانىندا "ەلباسى قورى" 146,6 ملرد تەڭگە سالىق بەرەشەگى بار ۇيىمدار تىزىمىندە بولعان. كەيىن ءساۋىر ايىندا قارىز كولەمى 3,4 مىڭ تەڭگەگە دەيىن قىسقارىپ، قور جابىلعانعا دەيىن بورىشكەرلەر قاتارىنان شىعارىلعان.
2023 جىلدىڭ قىركۇيەگىندە تىركەلگەن "بايتاۋ" دامۋ قورىنىڭ جالعىز قۇرىلتايشىسى رەتىندە نۇرسۇلتان نازارباەۆ كورسەتىلگەن. قوردىڭ زاڭدى مەكەنجايى بۇرىنعى "ەلباسى قورى" ورنالاسقان عيماراتپەن بىردەي. ۇيىم قۇرىلعان ۋاقىتتان بەرى مەملەكەت قازىناسىنا 1 ملرد تەڭگە كولەمىندە سالىق تولەگەن.
ال "نۇرسۇلتان نازارباەۆ قورى" الەۋمەتتىك جانە ءبىلىم بەرۋ جوبالارىن قولدايتىن ۇيىم رەتىندە جۇمىسىن جالعاستىرىپ كەلەدى. قوردى ەكس-پرەزيدەنتتىڭ قىزى داريعا نازارباەۆا باسقارادى. رەسمي مالىمەت بويىنشا، ۇيىم 2015 جىلدان بەرى بيۋدجەتكە 17,8 ملرد تەڭگە سالىق اۋدارعان. ونىڭ قۇرامىندا تۇڭعىش پرەزيدەنت مۋزەيى مەن باسقا دا بىرنەشە ەنشىلەس ۇيىم بار.
بۇعان قوسا، بۇعان دەيىن "نازارباەۆ قورى" Jusan Technologies ارقىلى ءىرى قارجى اكتيۆتەرىن باقىلاعانى تۋرالى اقپارات تاراعان بولاتىن. كەيىن Jusan توبىنىڭ اكتيۆتەرى قايتا قۇرىلىمدالىپ، بانك اكتسيالارى جاڭا مەنشىك يەلەرىنە وتكەن. سونداي-اق قورعا قاتىسى بار اكتيۆتەردىڭ ءبىرى رەتىندە رەسەيدەگى ازيا-تىنىق مۇحيتى بانكى دە اتالادى.
