قازاقستاننىڭ ەنەرگەتيكا مينيسترلىگى كاسپي قۇبىر كونسورتسيۋمىنىڭ (كقك) تەڭىز تەرمينالى اۋدانىندا ورىن العان توتەنشە وقيعاعا قاتىستى رەسمي حابارلاما تاراتتى، دەپ حابارلايدى "ادىرنا" ۇلتتىق پورتالى.
كونسورتسيۋم بەرگەن مالىمەتكە سايكەس، 30 شىلدە كۇنى «Nissos Sifnos» تانكەرىنە ءۇشىنشى ايلاق ارقىلى مۇناي تيەۋ جۇمىستارى اياقتالۋعا جاقىنداعان ساتتە، تيەۋ مانيفولدى اۋماعىندا ۇشقىشسىز ۇشۋ اپپاراتتارىنىڭ شابۋىلى تىركەلگەن.
بولعان وقيعاعا بايلانىستى قاۋىپسىزدىك شارالارىن قامتاماسىز ەتۋ ماقساتىندا كقك تاراپىنان مۇناي قۇيۋ وپەراتسيالارى الدىن الا توقتاتىلدى.
"ۇۇا شابۋىلى قاۋپىنە بايلانىستى كقك تاراپىنان مۇناي تيەۋ جۇمىستارى الدىن الا توقتاتىلدى", - دەلىنگەن مينيسترلىكتە.
سونداي-اق، تيەۋگە جوسپارلانعان «Marathi» تانكەرى كقك تەڭىز تەرمينالىنان 6-7 تەڭىز ءميلى قاشىقتىقتا درون شابۋىلىنا ۇشىراعان.
ۆەدومستۆونىڭ حابارلاۋىنشا، ەكيپاج مۇشەلەرى اراسىندا زارداپ شەككەندەر تىركەلمەگەن. شابۋىل سالدارىنان تۋىنداعان ءورت كقك-نىڭ ءۇش بۋكسيرىنىڭ كۇشىمەن تولىق ءسوندىرىلدى.
