قازاقستان كاسپي قۇبىر كونسورتسيۋمى (كقك) ارقىلى مۇناي تاسىمالداۋعا ەنگىزىلگەن ۋاقىتشا شەكتەۋلەرگە بايلانىستى ەكسپورتتىڭ بالاما باعىتتارىن پىسىقتاپ جاتىر، دەپ حابارلايدى "ادىرنا" ۇلتتىق پورتالى.
بۇل تۋرالى ەنەرگەتيكا مينيسترلىگىنىڭ رەسمي وكىلى اسەل سەرىكپاەۆا مالىمدەدى. مينيسترلىك مالىمەتىنشە، شىلدە ايىندا كقك مۇناي قابىلداۋ كولەمىن ۋاقىتشا شەكتەگەننەن كەيىن قازاقستان شيكىزاتتىڭ ءبىر بولىگىن باسقا ەكسپورتتىق باعىتتارعا قايتا بولۋگە ءماجبۇر بولعان.
اتاپ ايتقاندا، مۇناي اقتاۋ پورتى ارقىلى، اتاسۋ – الاشانكوۋ جانە اتىراۋ – سامارا باعىتتارىمەن تاسىمالدانعان. قازىر ۆەدومستۆو قازاقستاندىق مۇنايدى ەكسپورتتاۋدىڭ قوسىمشا مۇمكىندىكتەرىن دە زەردەلەپ جاتىر. ولاردىڭ قاتارىندا باكۋ – تبيليسي – دجەيحان مۇناي قۇبىرى، كاسپي تەڭىزى ارقىلى ازەربايجان اۋماعىنا جەتكىزۋ جانە باكۋ – سۋپسا باعىتى بار.
باكۋ – تبيليسي – دجەيحان باعىتى بويىنشا قازاقستان مۇنايى قازىردىڭ وزىندە تاسىمالدانىپ كەلەدى. قولدانىستاعى كەلىسىمدەر اياسىندا بۇل باعىتپەن جىلىنا شامامەن 1,2 ميلليون توننا مۇناي جەتكىزىلەدى.
ەنەرگەتيكا مينيسترلىگىنىڭ مالىمەتىنشە، ازەربايجان قازاقستاندىق مۇنايدى وسى باعىت بويىنشا قابىلداۋ كولەمىن جىلىنا 2,2 ميلليون تونناعا دەيىن ۇلعايتۋعا دايىن. بۇل جاعدايدا اتالعان باعىت ارقىلى قازاقستان مۇنايىنىڭ ەكسپورتى شامامەن 1 ميلليون تونناعا ارتۋى مۇمكىن.
بۇعان دەيىن دە كقك جۇمىسىنداعى شەكتەۋلەر كەزىندە قازاقستان مۇناي ەكسپورتىن بالاما باعىتتارعا قايتا بولگەن. ماسەلەن، وتكەن جىلدىڭ جەلتوقسانىندا شامامەن 300 مىڭ توننا مۇناي گەرمانيا، قىتاي جانە باكۋ – تبيليسي – دجەيحان باعىتىنا، سونداي-اق نوۆوروسسيسك پەن ۋست-لۋگا پورتتارى ارقىلى جەتكىزۋ ءۇشىن «قازترانسويل» جۇيەسىنە باعىتتالعان.
قازاقستاننىڭ مۇناي ەكسپورتىن ءارتاراپتاندىرۋ ماسەلەسى قارا تەڭىزدەگى كقك تەڭىز تەرمينالىنا جاسالعان درون شابۋىلدارىنان كەيىن وزەكتى بولا ءتۇستى.
