پاۆلوداردا «ازاماتتارعا ارنالعان ۇكىمەت» مەملەكەتتىك كورپوراتسياسى وبلىستىق فيليالى باسشىسىنىڭ بۇرىنعى مىندەتىن اتقارۋشى مەن الماتىلىق كاسىپكەرگە قاتىستى سوت ۇكىمى شىقتى، دەپ حابارلايدى "ادىرنا" ۇلتتىق پورتالى.
ءىس پاۆلودار قالاسىنىڭ قىلمىستىق ىستەر جونىندەگى اۋدانارالىق سوتىندا قارالدى. سوت ماتەريالدارىنا سايكەس، وقيعا 2025 جىلعى جەلتوقساندا بولعان. الماتىلىق كاسىپكەر جەر ۋچاسكەلەرىنىڭ كاداسترلىق قۇجاتتارىن جەدەل تىركەپ، ونداعى ارنايى بەلگىنى الىپ تاستاۋ ماسەلەسى بويىنشا فيليال باسشىسىنىڭ مىندەتىن اتقارۋشىعا جۇگىنگەن. لاۋازىمدى تۇلعا قاجەتتى قىزمەتتى كورسەتكەن. الايدا ونىڭ قىزمەتتى تەز ارادا ورىنداعانى ءۇشىن سىياقى كۇتەتىنىن تۇسپالداعانى انىقتالعان.
كەيىن كاسىپكەر شەنەۋنىكتىڭ قىزمەتتىك كابينەتىنە بارىپ، ونىڭ جۇمىس ۇستەلىنە پارفيۋمەريالىق دۇكەننىڭ 50 مىڭ تەڭگەلىك سىيلىق سەرتيفيكاتىن قالدىرعان. سوتتا مەملەكەتتىك كورپوراتسيا فيليالى باسشىسىنىڭ بۇرىنعى مىندەتىن اتقارۋشى پارا العانى، ال كاسىپكەر پارا بەرگەنى ءۇشىن جاۋاپقا تارتىلدى. ەكى سوتتالۋشى دا تاعىلعان ايىپتى تولىق مويىندادى.
سوت ۇكىمىمەن بۇرىنعى لاۋازىمدى تۇلعاعا 1 ميلليون 250 مىڭ تەڭگە ايىپپۇل، ال كاسىپكەرگە 750 مىڭ تەڭگە ايىپپۇل سالىندى.
