الماتىدا مەكتەپ وقۋشىسى Nissan Patrol كولىگىنىڭ تىزگىنىنە وتىرىپ، جەكە ءۇيدىڭ قورشاۋىن قيراتىپ كەتتى، دەپ حابارلايدى "ادىرنا".
جول-كولىك وقيعاسى بۇگىن تاڭەرتەڭ №106 مەكتەپتىڭ ماڭىندا بولعان. الدىن الا مالىمەت بويىنشا، Nissan Patrol كولىگىندە 10-سىنىپتا وقيتىن ەكى ءجاسوسپىرىم بولعان.
كۋاگەرلەردىڭ ايتۋىنشا، جول تالعامايتىن كولىك الدىمەن جول جيەگىندە تۇرعان Toyota RAV4 اۆتوكولىگىنە سوعىلىپ، ماڭىندا جۇرگەن بالالاردى قاعىپ كەتۋگە شاق قالعان. كولىك تىزگىنىندە وتىرعان ءجاسوسپىرىم ونى توقتاتپاق بولعانىمەن، تەجەگىشتىڭ ورنىنا گاز پەدالىن باسىپ كەتكەن. سونىڭ سالدارىنان Nissan Patrol جەكە ءۇيدىڭ تەمىر قورشاۋىنا سوعىلعان.
پوليتسيانىڭ مالىمەتىنشە، جول-كولىك وقيعاسى ساعات 10:00 شاماسىندا تۇركسىب اۋدانىندا بولعان. كامەلەتكە تولماعان جۇرگىزۋشى توقتوعۇل كوشەسىمەن كەلە جاتىپ، ارتيللەريا كوشەسىمەن قيىلىسىندا كولىكتى باسقارا الماي قالعان.
«جول-كولىك وقيعاسى سالدارىنان ەشكىم زارداپ شەككەن جوق»، – دەپ حابارلادى پوليتسيا.
قازىرگى ۋاقىتتا قۇقىق قورعاۋ ورگاندارى وقيعانىڭ بارلىق ءمان-جايىن انىقتاپ جاتىر. پوليتسيا ءجاسوسپىرىمنىڭ اتا-اناسى بالانى تاربيەلەۋ جونىندەگى مىندەتتەرىن تيىسىنشە ورىنداماعانى جانە ونىڭ كولىك باسقارۋىنا جول بەرگەنى ءۇشىن جاۋاپكەرشىلىككە تارتىلاتىنىن مالىمدەدى.
