1 قازاننان باستاپ الماتىدا سۋ تاريفتەرى وزگەرەدى. جاڭا تاريفتەر «الماتى سۋ» كومپانياسىنىڭ سايتىندا جاريالاندى، دەپ حابارلايدى "ادىرنا".
وزگەرىس تۇرعىندارعا دا، بيزنەس وكىلدەرىنە دە قاتىستى.
ققس-تى قوسا ەسەپتەگەندە، حالىق ءۇشىن جاڭا تاريفتەر مىناداي بولادى:
- سۋمەن جابدىقتاۋ – 1 تەكشە مەترىنە 178,06 تەڭگە;
- سۋ بۇرۋ (كارىز) – 1 تەكشە مەترىنە 119,46 تەڭگە.
وسىلايشا، ءبىر تەكشە مەتر سۋدىڭ سۋمەن جابدىقتاۋ جانە سۋ بۇرۋ قىزمەتتەرىن قوسا العانداعى قۇنى 297,52 تەڭگەنى قۇرايدى.
قازىرگى ۋاقىتتا سۋمەن جابدىقتاۋ ءتاريفى 76,56 تەڭگە، ال سۋ بۇرۋ قىزمەتى 47,50 تەڭگە بولىپ وتىر.
كوممەرتسيالىق ۇيىمدار ءۇشىن تاريفتەر حالىققا قاراعاندا جوعارى بولادى. 1 قازاننان باستاپ:
- سۋمەن جابدىقتاۋ – 362,18 تەڭگە/م³;
- سۋ بۇرۋ – 264,75 تەڭگە/م³.
ال مەملەكەتتىك مەكەمەلەر مەن ۇلتتىق كومپانيالار ءۇشىن سۋمەن جابدىقتاۋ ءتاريفى 649,60 تەڭگە/م³، سۋ بۇرۋ قىزمەتى 189,14 تەڭگە/م³ بولادى.
تۇرعىندار مەن ىستىق سۋمەن قامتاماسىز ەتەتىن ۇيىمدار ءۇشىن سۋىق سۋدىڭ ققس-سىز ءتاريفى 153,50 تەڭگە/م³، ال سۋ بۇرۋ قىزمەتى 102,98 تەڭگە/م³ دەڭگەيىندە بەلگىلەنگەن.
سۋ ەسەپتەگىشى جوق تۇرعىندار قانشا تولەيدى؟
سۋ ەسەپتەگىشى ورناتىلماعان جاعدايدا تولەم تۇرعىندار سانىنا قاراي ەسەپتەلەدى.
1 قازاننان باستاپ تۇرمىستىق جانە سانيتارلىق-گيگيەنالىق قاجەتتىلىكتەرگە پايدالانىلاتىن سۋ ءۇشىن ءبىر ادامعا ايىنا 2670,90 تەڭگە تولەنەدى.
ال سۋ بۇرۋ قىزمەتىنىڭ اي سايىنعى تولەمى ءبىر ادامعا 1791,85 تەڭگە بولادى. بۇعان دەيىن بۇل سوما 1148 تەڭگە بولعان.
ىستىق سۋدى بۇرۋ ءتاريفى، كەرىسىنشە، تومەندەپ، ءبىر ادامعا ايىنا 376,29 تەڭگەنى قۇرايدى. قازىرگى تولەم مولشەرى 712 تەڭگە بولعان.
قازاقستاندا اۋىز سۋ تاريفتەرىن بەلگىلەۋ ءتارتىبى دە وزگەردى. جاڭا سۋ كودەكسىنە سايكەس، وڭىرلىك ماسليحاتتارعا حالىق ءۇشىن اۋىز سۋدىڭ ءتاريفىن ءوز بەتىنشە بەلگىلەۋ قۇقىعى بەرىلدى. بۇل رەتتە ءتاريفتى بەكىتۋ كەزىندە ءوڭىردىڭ الەۋمەتتىك-ەكونوميكالىق جاعدايى مەن سۋمەن جابدىقتاۋدىڭ قولدانىستاعى قۇنى ەسكەرىلۋى ءتيىس.
ايتا كەتەيىك، ەلدە كوممۋنالدىق قىزمەتتەردىڭ تاريفتەرىن كەزەڭ-كەزەڭىمەن كوتەرۋ جالعاسىپ جاتىر. بۇل حالىق پەن بيزنەس ءۇشىن باعانىڭ بىردەن كۇرت وسۋىنە جول بەرمەۋ ماقساتىندا جۇزەگە اسىرىلۋدا.
