قازاقستاندا اۆتوجول سالاسىن رەفورمالاۋ جونىندەگى ۇكىمەتتىك جۇمىس توبى قۇرىلدى. ول جول قۇرىلىسىنىڭ ساپاسىن ارتتىرۋ، قولدانىستاعى ستاندارتتاردى جاڭارتۋ جانە مەملەكەتتىك قاراجاتتىڭ ءتيىمدى جۇمسالۋىن قامتاماسىز ەتۋ ماسەلەلەرىن قاراستىرادى. بۇل تۋرالى بۇگىن، 14 قازاندا ۇكىمەتتىڭ ءباسپاسوز قىزمەتى مالىمدەدى، دەپ حابارلايدى «ادىرنا» ءتىلشىسى.
پرەمەر-مينيستر ولجاس بەكتەنوۆتىڭ وكىمىمەن قۇرىلعان جۇمىس توبى مەملەكەت باسشىسىنىڭ قازاقستان حالىق كەڭەسىنىڭ العاشقى سەسسياسىندا بەرگەن تاپسىرمالارىن جۇزەگە اسىرۋعا باعىتتالعان.
«جۇمىس توبى جول قۇرىلىسىنىڭ قازىرگى جۇيەسىن جانە ونىڭ ساپاسىن باعالاۋ تاسىلدەرىن قايتا قاراستىرادى. سونىمەن قاتار قۇرىلىس نورمالارى مەن ستاندارتتارىن جاڭارتۋ، سالانى باسقارۋدىڭ جاڭا تەتىكتەرىن ەنگىزۋ، تسيفرلىق شەشىمدەر ارقىلى جول ينفراقۇرىلىمىن جاقسارتۋ ماسەلەلەرى پىسىقتالادى. بۇدان بولەك، مەملەكەتتىك قاراجاتتى پايدالانۋدىڭ تيىمدىلىگى مەن اشىقتىعىن ارتتىرۋعا باسىمدىق بەرىلەدى»،–دەلىنگەن حابارلامادا.
جۇمىس توبىنا پرەمەر-ءمينيستردىڭ ءبىرىنشى ورىنباسارى جەتەكشىلىك ەتەدى. ونىڭ قۇرامىنا بىرقاتار مينيسترلىكتەردىڭ باسشىلىعى، باس كولىك پروكۋرورىنىڭ ورىنباسارى، ۇلتتىق كومپانيالار مەن سالالىق عىلىمي-زەرتتەۋ ۇيىمدارىنىڭ وكىلدەرى، سونداي-اق ساراپشىلار مەن قۇرىلتاي دەپۋتاتتارى ەندى.
پرەمەر-مينيستر جۇمىس توبىنا 2026 جىلعى 1 جەلتوقسانعا دەيىن اۆتوجول سالاسىن تۇبەگەيلى رەفورمالاۋ جونىندە ۇسىنىستار ازىرلەۋدى تاپسىردى. ۇسىنىستارعا زاڭنامالىق وزگەرىستەر دە ەنگىزىلۋى ءتيىس.
