ماڭعىستاۋ مەديتسينا قىزمەتكەرلەرى حالىققا ۇندەۋ تاستادى. ۇندەۋدە تۇرعىنداردىڭ قاۋىپسىزدىگى، سالا قىزمەتكەرلەرىنىڭ جۇمىسىنا تۇسىنىستىكپەن قاراۋى، بەيبىت باسقوسۋلارداعى قاۋىپسىزدىك جايى ايتىلادى، دەپ حابارلايدى "ادىرنا" ۇلتتىق پورتالى.
ماڭعىستاۋ مەديتسينا قىزمەتكەرلەرى حالىققا ۇندەۋى:
- ءبىز، ءوز ناۋقاستارىمىزدىڭ ءومىرى مەن دەنساۋلىعىن ساقتاۋ ماقساتىندا تاۋلىك بويى قىزمەت كورسەتەتىن ماڭعىستاۋدىڭ كاسىبي مەديتسينا قىزمەتكەرلەرىنىڭ قاۋىمداستىعى، 10 مامىر كۇنى كەشكە جاڭاوزەن قالاسىنداعى مۇناي-گاز سالاسىنا جۇمىسقا ورنالاسۋدى تالاپ ەتىپ، اشتىق جاريالاعان ادامدارعا قىزمەت كورسەتتىك.
اشتىق جاريالاۋ باستالعاننان بەرى 24 ساعاتتىڭ ىشىندە نارازىلىق بىلدىرۋشىلەردەن دەنساۋلىقتارىنىڭ ناشارلاۋىنا بايلانىستى جەدەل جاردەمگە 6 قوڭىراۋ كەلىپ ءتۇستى. ءبىزدىڭ ماماندار ءوتىنىش بىلدىرگەندەردىڭ جاعدايىن مۇقيا تەكسەردى (1992-1999 جىل ارالىعىنداعى و.ب.، ح.ي.، ج.ە.، د.ي.، د.ق، ق.ب. ەسىمدى جاس ازاماتتار.) ولاردىڭ ايتۋىنشا، ءال-اۋقاتى ناشارلاعان. بىراق تەكسەرىس بارىسىندا دەنساۋلىقتارىنا قاۋىپ ءتونىپ تۇرعان جاعداي انىقتالعان جوق.ءوتىنىش بەرۋشىلەر بىردەن اۋرۋحاناعا جاتقىزۋدان باس تارتىپ، اكتسيالارىن جالعاستىرۋ كەرەك ەكەنىن ايتتى. سونىمەن قاتار ولار وسى اقپاراتتى الەۋمەتتىك جەلىلەردە جاريالاۋ ءۇشىن جەدەل جاردەم قىزمەتكەرلەرىن ۇيالى تەلەفوندارىنا ءتۇسىردى.ءبىز ازاماتتاردىڭ ءوز پىكىرىن بەيبىت تۇردە ءبىلدىرۋ قۇقىعىن قۇرمەتتەيمىز، الايدا جەدەل جاردەم قىزمەتىن نەگىزسىز ءوز ماقساتتارىنا پايدالانۋ دۇرىس ەمەس. سەبەبى وزگە دە اۋىر حالدە جاتقان ناۋقاستارعا زيانىن تيگىزەتىنىن ۇمىتپاۋىمىز قاجەت. ءبىزدىڭ قىزمەتكە دەنساۋلىعىنا قاۋىپ ءتونىپ تۇرعان، شۇعىل مەديتسينالىق كومەكتى قاجەت ەتەتىن ازاماتتار جۇگىنەدى. ءبىز ءۇشىن ادام ءومىرى وتە ماڭىزدى.جاڭاوزەندە ايىنا ورتا ەسەپپەن 3000-عا جۋىق ادام مەديتسينالىق كومەككە جۇگىنەدى. كۇنىنە 90-100 ادامنان قوڭىراۋ كەلىپ تۇسەدى. ادەتتە، جول-كولىك وقيعالارىنان زارداپ شەككەندەر، ەگدە جاستاعى ادامدار، جۇكتى ايەلدەر مەن كىشكەنتاي بالالارى بار انالارى جانە اۋىر دەرتپەن اۋىراتىن ادامدار جەدەل جاردەم قىزمەتىنە جۇگىنەدى.ايتا كەتسەك، 10 مامىردان باستاپ جاڭاوزەننىڭ 189 تۇرعىنى ءبىزدىڭ قىزمەتكە جۇگىندى. اشتىق جاريالاعان ازاماتتار تاراپىنان قان قىسىمىن تەكسەرتۋ ماقساتىندا جەدەل جاردەم بريگادالارىنا التى رەت شاقىرتۋ ءتۇستى. ءدال سول ساتتە ساعات 21:00-23.00-گە دەيىنگى ۋاقىت ارالىعىندا وزگە دە تۇرعىنداردان 23 قوڭىراۋ ءتۇستى. ينفاركت -1, ينسۋلت – 2, ءىشتىڭ اۋىرۋى بار جۇكتى ايەلدەر-2, بوسانۋ-2, تەمپەراتۋراسى 40 گرادۋسقا دەيىن كوتەرىلگەن بالالار – 13 جانە ەگدە جاستاعى ادامداردان ءۇش شاقىرتۋ بولدى.ءبىز، ماڭعىستاۋدىڭ مەديتسينا قىزمەتكەرلەرى، ءاربىرىڭىزدىڭ پىكىرىڭىزدى، دەنساۋلىعىڭىزدى قۇرمەتتەيمىز. بىراق جەدەل جاردەم قىزمەتىن ءوز ماقساتتارىڭىزعا پايدالانباۋدى سۇرايمىز.ءبىز سىزگە كومەكتەسۋدەن باس تارتپايمىز جانە ءومىرىڭىز بەن دەنساۋلىعىڭىزدى ساقتاۋ ءۇشىن شاقىرتۋ العان ساتتەن باستاپ بارامىز.وسىعان بايلانىستى ءبىز جەدەل جاردەم بريگاداسىنىڭ كەلۋىن مينۋتتار ساناپ كۇتكەن باسقا دا ادامداردىڭ شاقىرتۋىنا ۇلگەرمەۋىمىز مۇمكىن. ال، ول ءسىزدىڭ جاقىن ادامىڭىز بولۋى مۇمكىن.
ءبىر-ءبىرىمىزدى باعالاپ، قۇرمەتتەيىكشى!
"ادىرنا" ۇلتتىق پورتالى
