پوليتسيا 4 مىڭنان اسا جول اپاتىن ەسەپكە الماعان. بۇل تۋرالى قازاقستان رەسپۋبليكاسىنىڭ باس پروكۋراتۋراسى پوليتسەيلەر جول-كولىك وقيعاسى تۋرالى مالىمەتتەردى جاسىرىپ، بۇرمالايتىنىن ايتتى، دەپ حابارلايدى “ادىرنا” ۇلتتىق پورتالى kolesa.kz سايتىنا سىلتەمە جاساپ.
قۇقىقتىق ستاتيستيكانى بۇرمالاۋ ارەكەتى كوبەيىپ كەتتى. كەيىنگى ءۇش جىلدا ءتورت مىڭنان اسا جول اپاتى زاڭ اياسىندا تىركەلمەگەنى انىقتالدى، — دەدى باس پروكۋرور بەرىك اسىلوۆ.
BaigeNews.kz حابارلاعانداي، قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى ەلدەگى جول-كولىك وقيعاسى تۋرالى مالىمەتتى ۇنەمى تەكسەرىپ، سالىستىرىپ وتىرادى.دەگەنمەن، جازاتايىم وقيعانى وعان جاۋاپتى لاۋازىمدى تۇلعا جەكە پايداسى ءۇشىن تىركەمەي، جاسىرىپ قالۋى مۇمكىن ەكەنىن دە ايتتى.
سوندىقتان كوميتەت باقىلاۋدى كۇشەيتىپ، كىنالى قىزمەتكەرلەردى قاتاڭ جازالاۋ ارقىلى جول اپاتىن جاسىرۋ فاكتىسىن توقتاتۋعا بولادى دەپ سانايدى.
پروكۋراتۋرانىڭ ايىپتاۋىنا جاۋاپ رەتىندە قر ىشكى ىستەر ءمينيسترىنىڭ ورىنباسارى يگور لەپيوحا جول-كولىك وقيعاسىن جاسىرۋ فاكتىسىنە قاتىستى تەرگەۋ ءجۇرىپ جاتقانىن ايتتى.
بۇل فاكتىلەردى قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتپەن بىرگە تەكسەرىپ جاتىرمىز، ەگەر زاڭ بۇزعانى انىقتالسا، بارلىق قىزمەتكەر جاۋاپقا تارتىلادى، — دەدى پوليتسەي.
اقپاراتقا سۇيەنسەك، پوليتسەيلەر ستاتيستيكانى ۇنەمى وزگەرتە بەرگەن سوڭ وسىدان ون شاقتى جىل بۇرىن جول-كولىك وقيعاسىن ەسەپكە الۋ فۋنكتسياسى پروكۋرورلارعا بەرىلگەن.
بيىل 9 ايدا قازاقستاندا جول اپاتىنان 1680 ادام كوز جۇمدى. بىلتىر 2425 وتانداسىمىز قارا جولدا قازا تاپقان. 2021 جىلى — 2270, ال 2020 جىلى — 1997 ادام. كەيىنگى بەس جىلدا ەلىمىزدە جول اپاتى 10 مىڭنان اسا ادامنىڭ ءومىرىن جالمادى، بۇل وبلىستىق ماڭىزى بار قالا حالقىنىڭ سانىمەن بىردەي.
