قاراعاندى وبلىسىنىڭ اكىمى قازا تاپقان كەنشىلەردىڭ وتباسىنا باردى، دەپ حابارلايدى "ادىرنا" ءتىلشىسى.
ەرماعانبەت بولەكپاەۆ قازا تاپقان كەنشىلەردىڭ تۋىستارى مەن جاقىندارىنىڭ وتباسىلارىنا باردى. بۇل تۋرالى وبلىس باسشىسى Facebook جەلىسىندەگى پاراقشاسىندا ءبولىستى.
"بۇگىنگى كۇندى قايتىس بولعان كەنشىلەردىڭ تۋىستارى مەن جاقىندارىنا بارۋدان باستادىم. ولارعا كوڭىل ايتىپ، قولداۋ ءبىلدىردىم.
مەملەكەت باسشىسىنىڭ تاپسىرماسى بويىنشا وبلىس اكىمدىگى وتباسىلارعا ماتەريالدىق قولداۋ مەن جەرلەۋ راسىمدەرىن ۇيىمداستىرۋ جانە وزگە دە قاجەتتى كومەك كورسەتۋ شارالارىن ىسكە اسىرۋ ءۇشىن جەدەل تارتىپتە جۇمىس جاساۋدا. ءار وتباسى كوتەرگەن ماسەلەلەر جەكەلەي شەشىلەتىن بولادى. بۇل ماسەلە مەنىڭ جەكە باقىلاۋىمدا.
مەن سىزدەردى قابىلدانعان شارالار تۋرالى حاباردار ەتىپ وتىرامىن",-دەپ جازدى وبلىس اكىمى.
