«كوشپەندىلەر» ءفيلمى ءۇشىن بەكىنىستى بۇرىنعى مادەنيەت جانە سپورت ءمينيسترى ارىستانبەك مۇحامەديۇلىنا قاتىسى بار كومپانيا ساتىپ العان. مامىلە قۇنى ايتارلىقتاي تومەندەدى. بۇل تۋرالى بريفينگتە «انتيكور» رەسمي وكىلى ارمان تىلەۋكەنوۆ مالىمدەدى، دەپ حابارلايدى "ادىرنا" ءتىلشىسى.
اڭگىمە الماتى وبلىسىنداعى «كوشپەندىلەر» ءفيلمىنىڭ ءتۇسىرىلىم الاڭى جانە ءتۇسىرۋ ورنى رەتىندە سالىنعان بەكىنىس تۋرالى بولىپ وتىر.
«جاساندى قامال تاريحي فيلمدەر ءتۇسىرۋ ءۇشىن بيۋدجەتتىك اقشاعا سالىنعان. تۇركىستاننىڭ جاساندى بەكىنىسى بۇرىنعى مادەنيەت جانە سپورت مينيسترلىگىنىڭ باسشىلىعىنا قاراستى كوممەرتسيالىق ۇيىمعا ونىڭ قۇرىلىسىنا جۇمسالعان قارجىدان 44 ەسە تومەن باعاعا ساتىلعان. قازىر بۇل اكتيۆتى مەملەكەتكە قايتارۋ شارالارى جۇرگىزىلۋدە»، – دەدى ارمان تىلەۋكەنوۆ.
انتيكور بۇل قىلمىستىق ىسكە ەكس-ءمينيستردىڭ قاتىسى بار-جوعىن تەكسەرىپ جاتىر، ال «قازاقفيلم» اق بۇرىنعى باسشىسىنا قاتىستى تەرگەۋ امالدارى جۇرگىزىلۋدە.
ەسكە سالا كەتەيىك، قازىر مۇحامەديۇلىنىڭ ۇستىنەن «ديپلومات» قوناقۇيىن رەيدەرلەردىڭ باسىپ الۋىنا قاتىستى ءىس بويىنشا سوت ءجۇرىپ جاتىر. ال ماۋسىم ايىندا ەكس-مينيستر باس ەكسپوناتى «التىن ادام» بولاتىن حالىقارالىق كورمەگە بولىنگەن 221 ميلليون تەڭگەنى جاسىرىپ، ۇرلاعانى ءۇشىن كىنالى دەپ تانىلىپ، سەگىز جىلعا باس بوستاندىعىنان ايىرىلعان بولاتىن.
