كوكشەتاۋدا عالىمنىڭ ەسكەرتكىشى كورپەگە ورالعان كۇيىندە قوقىستان تابىلدى، دەپ حابارلايدى "ادىرنا" ءتىلشىسى ۇلىسمەدياعا سىلتەپ.
شوقان ءۋاليحانوۆتىڭ ەسكەرتكىش-ءبيۋستى كىر كورپەگە ورالعان كۇيدە قوقىسقا تاستالعان. قۇندى بيۋست قالانىڭ شەتكى ايماقتارىنىڭ بىرىندە قوقىس ۇيىندىلەرى مەن گاراجداردىڭ اراسىنان تابىلىپتى.
ەل ءۇشىن ايانباي ەڭبەك ەتكەن تۇلعا ءمۇسىنىنىڭ لاس جەردە جاتقانى كوپتىڭ نازارىن اۋدارتىپ، قوعام اراسىندا رەزونانس تۋدىردى.
ءبيۋستتى تاۋىپ العان قالا تۇرعىنى - اسلان تولەگەنوۆ.
«قالا ىشىندە قوقىستار مەن گاراجداردىڭ اراسىندا ەسكەرتكىش جاتقانى تۋرالى سىبىس جەلدەي ەسكەن ەدى. سونى انىقتاپ بىلەيىن دەپ ارنايىلاپ بارعانمىن. ەسكەرتكىش-بيۋست پاتشالىق رەسەي كەزىندەگى فورمامەن تۇرعان شوقان ءۋاليحانوۆتىڭ ەسكەرتكىشى ەكەن. ەسكەرتكىشتىڭ قانداي سەبەپپەن قوقىسقا تاستالعانى، ەسكى جارىلعان كولىك دوڭگەلەكتەرىنىڭ استىندا جاتقانى بەلگىسىز. ەسكەرتكىشتى سۋعا باتقان ادام ءتارىزدى ەسكى جىرىم-جىرىم بولعان كورپەمەن وراپ، سىممەن سىرتىنان بايلاپ تاستاعان. ەسكەرتكىش قوقىستىڭ اراسىندا جاتىر»، - دەيدى ول.
اقمولا وبلىسىنىڭ مادەنيەت باسقارماسى باسشىلىعى اتالعان بيۋست كىمگە تيەسىلى ەكەنىن انىقتاعان. ول جەكە كوللەكتسيا جۇرگىزەتىن مەيرام قويشىباەۆ دەگەن ادامعا تيەسىلى بولىپ شىقتى. باسقارما جاۋابىندا:
«قالالىق الەۋمەتتىك پابليكتەردە شوقان ءۋاليحانوۆ ءمۇسىنىنىڭ ءتيىستى تۇردە ساقتالماعانى تۋرالى اقپارات تاراعان بولاتىن. بىراق اتالعان اقپارات شىندىققا جاناسپايدى. ويتكەنى اتالعان بيۋست سۋرەتشى مەيرام قويشىباەۆتىڭ جەكە مەنشىك كوللەكتسياسىندا بولعان. ءمۇسىنشى قايتىس بولعاننان كەيىن بيۋست ونىڭ جاقىندارى جەكەمەنشىك تەرريتورياعا تاسىمالداعان»، - دەيدى اقمولا وبلىسىنىڭ مادەنيەت باسقارماسىنان.
