مەملەكەتتىك كەڭەسشى ەرلان قارين پارلامەنت ماجىلىسىندەگى ساياسي پارتيالاردىڭ التى فراكتسياسىنىڭ جەتەكشىلەرىمەن كەزدەسۋ وتكىزدى، دەپ حابارلايدى "ادىرنا" ۇلتتىق پورتالى.
ءىس-شاراعا «امانات» پارتياسى فراكتسياسىنىڭ جەتەكشىسى ەلنۇر بەيسەنباەۆ، «اۋىل» حدپ فراكتسياسىنىڭ جەتەكشىسى سەرىك ەگىزباەۆ، «رەسپۋبليكا» پارتياسى فراكتسياسىنىڭ جەتەكشىسى ايداربەك حودجانازاروۆ، «اق جول» قدپ فراكتسياسىنان ازات پەرۋاشەۆ، قحپ فراكتسياسىنىڭ جەتەكشىسى ماگەررام ماحارراموۆ، جسدپ فراكتسياسىنىڭ جەتەكشىسى اسحات راحىمجانوۆ، سونداي-اق پرەزيدەنتتىڭ پارلامەنتتەگى وكىلدىگىنىڭ جەتەكشىسى امىربەك وسپانبەكوۆ تە قاتىستى.
«كەزدەسۋ بارىسىندا «ادال ادام – ادال ەڭبەك – ادال تابىس» تاقىرىبىندا ۇلتتىق قۇرىلتايدىڭ ءىىى وتىرىسىندا پرەزيدەنتتىڭ سويلەگەن سوزىندە ايتىلعان باستامالارى مەن تاپسىرمالارىن ءتيىمدى جۇزەگە اسىرۋدىڭ شارالارى مەن تەتىكتەرى تۋرالى پىكىر الماسۋ بولدى»، - دەلىنگەن اقوردا سايتىندا 2024 جىلدىڭ 19 ناۋرىزىندا جاريالانعان حابارلامادا.
مەملەكەتتىك كەڭەسشى پرەزيدەنتتىڭ كوپتەگەن باستامالارىن ءىس جۇزىندە جۇزەگە اسىرۋ زاڭنامالىق قولداۋدى جانە تۇتاستاي العاندا دەپۋتاتتىق كورپۋستىڭ بەلسەندى كومەگىن قاجەت ەتەتىنىن اتاپ ءوتتى.
اڭگىمە، ەڭ الدىمەن، ەسىرتكى ءوندىرۋ، قۇمار ويىنعا تاۋەلدىلىك، بۇزاقىلىق، تۇرمىستىق زورلىق-زومبىلىق ءۇشىن جاۋاپكەرشىلىكتى زاڭنامالىق تۇرعىدان كۇشەيتۋ، سونداي-اق مەملەكەتتىك ناگرادالار، ونوماستيكا، ارحەولوگيالىق قىزمەت جانە باسقا دا بىرقاتار زاڭدارعا وزگەرىستەر ەنگىزۋ تۋرالى بولدى.
ونوماستيكا، ناشاقورلىق، بۇزاقىلىققا قارسى كۇرەس تۋرالى زاڭ جوبالارى ماجىلىستە قارالىپ جاتقانى، تۇرمىستىق زورلىق-زومبىلىققا قارسى كۇرەس تۋرالى زاڭ ماجىلىستە قابىلدانىپ، سەناتقا ۇسىنىلعانى ايتىلدى.
سونىمەن بىرگە، بۇزاقىلىق تەك ەسكەرتكىشتەر مەن تابيعي نىسانداردى قورلاۋ عانا ەمەس، سونىمەن قاتار قوعامدىق ورىنداردا مۇلىكتى ءبۇلدىرۋ ەكەنى ەرەكشە اتاپ ءوتىلدى. دەپۋتاتتار بۇزاقىلىق جانە باسقا دا تۇرمىستىق قۇقىق بۇزۋشىلىقتار ءۇشىن جازانىڭ بۇلتارتپاستىعىن كۇشەيتۋدى جاقتادى.
