اق ءۇي رەسەي تاراپىنان ۋكراينانىڭ ەنەرگەتيكالىق نىساندارىنا جاسالعان سوڭعى جاپپاي زىمىراندىق شابۋىلدى ايىپتاپ، ۋكرايناعا كومەك تۋرالى زاڭ جوباسىن تەز ارادا قابىلداۋ قاجەتتىگىن ايتتى دەپ حابارلايدى "ادىرنا" پورتالى. بۇل تۋرالى اق ءۇيدىڭ ۇلتتىق قاۋىپسىزدىك كەڭەسىنىڭ وكىلى ادريەن ۋوتسون مالىمدەدى.
«ءتۇن ىشىندە رەسەي ۋكراينانىڭ ەلەكتر جەلىسىنە سوعىس باستالعاننان بەرگى ەڭ ءىرى اۋە شابۋىلدارىنىڭ ءبىرىن جاساپ، ەرتە كوكتەمنىڭ سالقىن كۇندەرىندە ەلدەگى كوپتەگەن ادامداردى جىلۋدان، سۋدان جانە ەلەكتر ەنەرگياسىنان ايىردى»، - دەلىنگەن حابارلامادا.
«رەسەيدىڭ ۋكراينانىڭ ماڭىزدى ينفراقۇرىلىمىنا جاساعان شابۋىلدارىنىڭ ءبىر بولىگى بولىپ تابىلاتىن بۇل جارىلىس ۆلاديمير ءپۋتيننىڭ ۋكراين حالقىنىڭ رۋحىن بۇزىپ، ونى قاراڭعىلىققا باتىرۋعا تىرىسقان قورقىنىشتى ەسكە سالادى. ۋكرايناعا وسى جالعاسىپ جاتقان شابۋىلداردان قورعانۋعا كومەكتەسۋ ءۇشىن بىزگە وكىلدەر پالاتاسى ەكى جاقتى ۇلتتىق قاۋىپسىزدىك تۋرالى قوسىمشا زاڭ جوباسىن قابىلداۋى كەرەك، وسىلايشا ءبىز ۋكرايناعا كوبىرەك اۋە قورعانىسى مۇمكىندىكتەرىن جىبەرە الامىز. ۋكرايناعا شۇعىل كومەك قاجەت جانە ءبىز بۇدان ءارى كەشىگۋگە جول بەرە المايمىز» دەدى ۋوتسون.
كەشە تۇندە ماسكەۋ ۋكرايناداعى ەنەرگەتيكالىق نىساندارعا زىمىران مەن ۇشقىشسىز شابۋىل جاسادى. ۋكراينا پرەزيدەنتى ۆلاديمير زەلەنسكيدىڭ ايتۋىنشا، ورىستار كورشى مولدوۆا ارقىلى وتەتىن دنەستر وزەنىندە ورنالاسقان كانيۆ جانە دنەستر سۋ ەلەكتر ستانسالارىن كوزدەگەن.
«رەسەي لاڭكەستىك مەملەكەتى كاحوۆكا سۋ ەلەكتر ستانتسياسىن تالقانداعاننان كەيىن حەرسون وبلىسىنداعى ەكولوگيالىق اپاتتى قايتالاعىسى كەلەدى. بۇل جولى ۋكرايناعا عانا ەمەس، مولدوۆاعا دا قاۋىپ ءتونىپ تۇر»، - دەدى ول X پلاتفورماسىندا.
وتكەن اپتادا تۇندە بولعان جاپپاي شابۋىلدا رەسەي ۋكراينانىڭ وڭتۇستىگىندەگى زاپوروجە وبلىسىنداعى دنەپر سۋ ەلەكتر ستانتسياسىنىڭ ەڭ ۇلكەن بوگەتىنە دە سەگىز رەت سوققى بەرگەن بولاتىن.
