جەتىسۋ وبلىسىنىڭ كوكسۋ اۋدانىندا ءتورت كۇن بۇرىن ءىز-ءتۇسسىز جوعالىپ كەتكەن 29 جاستاعى ەر ادام ءولى كۇيىندە تابىلدى، - دەپ حابارلايدى “ادىرنا” ۇلتتىق پورتالى جەتىسۋ وبلىستىق ءىىد ءباسپاسوز قىزمەتىنە سىلتەمە جاساپ.
ءساۋىردىڭ 23-ءى كۇنى كوكسۋ اۋداندىق ىشكى ىستەر بولىمىنە ەڭبەكشىقازاق اۋىلىنىڭ تۇرعىنى ۇلىنىڭ جوعالىپ كەتكەنى تۋرالى ارىزبەن حابارلاسقان. ايتۋىنشا، بالاسى مال باعۋعا شىعىپ، قايتىپ ورالماعان. جوعالعان ادامدى ىزدەۋگە اۋداندىق پوليتسيانىڭ بارلىق جەكە قۇرامى، جەرگىلىكتى تۇرعىندار مەن ەرىكتىلەر جۇمىلدىرىلدى.
«سول كۇنى ءىز-ءتۇزسىز جوعالعان جىگىتتىڭ جىلقىسى ەسكەلدى اۋدانىنا قاراستى جاڭالىق اۋىلىنان تابىلدى. 27 ساۋىردە جەدەل-ىزدەستىرۋ شارالارى بارىسىندا ءىز-ءتۇزسىز جوعالعان ادامنىڭ دەنەسى كوكسۋ وزەنىنىڭ تۇبىنەن زورلىق-زومبىلىق بەلگىلەرىنسىز تابىلدى. قازىرگى ۋاقىتتا قاجەتتى ساراپتامالار تاعايىندالدى»، — دەدى پوليتسيا دەپارتامەنتى باستىعىنىڭ ورىنباسارى ەلدار ابدىكەنوۆ.
وبلىستىق پوليتسەيلەر قۇقىق قورعاۋ ورگاندارىنا كومەك كورسەتكەن جەرگىلىكتى تۇرعىندار مەن ەرىكتىلەرگە العىسىن ءبىلدىرىپ، اۋىل تۇرعىندارىن بارىنشا ساقتىق پەن قىراعىلىق تانىتۋدى سۇرادى.
