پسيحولوگ سەرىكگۇل ءسالي قازاق قىزدارىنىڭ ومىرلىك جارى رەتىندە نەگە شەتەلدىك جىگىتتەردى تاڭداپ جاتقانىن ايتتى. ماماننىڭ پىكىرىنشە، بۇعان قازاق جىگىتتەرىنىڭ «ومىرگە كوزقاراسىنىڭ ەسكىلىگى» تۇرتكى بولىپ وتىر، دەپ حابارلايدى “ادىرنا” ۇلتتىق پورتالى Express Qazaqstan سايتىنا سىلتەمە جاساپ.
سەرىكگۇل ءساليدىڭ ايتۋىنشا، قازاق جىگىتتەرى قازاق قىزدارىنىڭ بويىنداعى ادامگەرشىلىك، ۇياڭدىق، ار-ۇيات، نازىكتىك سەكىلدى عاجايىپ قاسيەتتەرىن دۇرىس باعالاي الماي ءجۇر. بۇل قاسيەتتەر باسقا ەلدەردىڭ ايەلدەرىندە جويىلىپ بارا جاتىر. سوندىقتان وزگە ەل ازاماتتارىنىڭ قازاق قىزدارىنا ءجيى اڭسارى اۋادى ەكەن.
ءوز باسىم، قىزداردىڭ باسقا ۇلتقا شىعۋىنا قارسى ەمەسپىن. ويتكەنى قازاق جىگىتتەرىنىڭ ومىرگە كوزقاراستارى وتە ەسكىرگەن. ايەلدەردى وزىنەن تومەن سانايدى. تەڭدىك بەرمەيدى. بەلگىلى ءبىر شەڭبەرگە سىيدىرعىسى كەلەدى،
— دەيدى پسيحولوگ.
ال قازاق ايەلدەرى ول شەڭبەردەن شىققىسى كەلەدى. دەنە ءبىتىمى تۇرعىسىنان ەمەس، مەتافيزيكا، ومىرگە كوزقاراسى جاعىنان ەر اداممەن تەڭ ەكەنىن سەزىنەدى.
سوندىقتان قازاق جىگىتتەرىنىڭ كوزقاراسىنا كەلىسپەيدى. سول شەڭبەردىڭ ىشىندە ءومىر ءسۇرىپ جاتقان ايەلدەر ءالى دە كوپ،
—دەيدى سەرىكگۇل ءسالي.
ماماننىڭ ايتۋىنشا، وزگە ۇلتقا تۇرمىسقا شىققان ايەلدەر مەن وزگە ۇلتتىڭ قىزىنا ۇيلەگەن جىگىتتەردە ءبىراز ايىرماشىلىق بار. جىگىتتەرگە قاراعاندا، قىزدار ۇلتتىق مەنتاليتەتتى بەرىك ۇستايدى ەكەن. باسقا ۇلتقا بالا تۋىپ بەرسە دە، ونى قازاق ۇلتىنىڭ مەنتاليتەتىندە تاربيەلەمەك. ال جىگىتتەردىڭ بالالارى سول ۇلتقا ءسىڭىپ كەتەتىن كورىنەدى.
مەن شەتەلدىكتەرگە كۇيەۋگە شىققان 20-عا جۋىق قىزدى بىلەمىن. ءبىرى يتاليادا، ءبىرى تۇركيادا تۇرىپ جاتسا دا، ءبارى بالاسىن قازاقستانعا اكەپ تۋىپ جاتىر. بالانى انا تاربيەلەيدى. بالاسىنىڭ بويىنا قازاق مەنتاليتەتىن سىڭىرەدى،
—دەيدى سەرىكگۇل ءسالي.
دەسە دە، قوعامدا قازاق قىزدارىنىڭ شەتەلدىكتەرگە تۇرمىسقا شىعۋىنا قارسىلىق وتە كۇشتى. ماسەلەن، تالعار ماڭىندا قازاق قىزىنا ۇيلەنىپ جاتقان قىتاي جىگىتى تويىن توقتاتۋعا ءماجبۇر بولدى. افريكالىق جىگىتكە تۇرمىسقا شىققان قىزدىڭ ۇزاتۋى جەلىلەردە ءالى تولقۋ تۋدىرىپ وتىر. ءتىپتى، قازاق قىزىمەن سويلەسىپ تۇرعان شەتەلدىكتەردى تىرقىراتىپ قۋىپ جۇرگەنىن الەۋمەتتىك جەلىدە تۇراقتى تۇردە جاريالاپ جۇرگەن ادامدار دا بار.
الەمنىڭ دامۋ ۇردىسىنەن كوپ ادامنىڭ حابارى جوق. جاڭا ءومىر كەڭىستىگى — ينتەرنەت پايدا بولعان. عالامتور بارلىق شەكارالاردى ءوشىردى. قازىرگى بالالاردىڭ قۇندىلىعى — ايفون، مورگەنشتەرن. مۇلدە باسقا ۇرپاق ءوسىپ كەلەدى،
—دەيدى پسيحولوگ.
ونىڭ ايتۋىنشا، قازىر ەكى بۋىن اراسىنداعى كۇرەس ءجۇرىپ كەلەدى. ناتيجەسىندە، بولاشاقتا ۇلتتىق قۇندىلىقتار تولىق جويىلماسا دا، وعان تۇبەگەيلى وزگەرىس ەنبەك.
”ادىرنا” ۇلتتىق پورتالى
