Qazaq jigitteriniń kózqarasy óte eski bolǵandyqtan bizdiń qyzdar sheteldikke shyǵady - PSIHOLOG

6128
Adyrna.kz Telegram

Psıholog Serikgúl Sálı qazaq qyzdarynyń ómirlik jary retinde nege sheteldik jigitterdi tańdap jatqanyn aıtty. Mamannyń pikirinshe, buǵan qazaq jigitteriniń «ómirge kózqarasynyń eskiligi» túrtki bolyp otyr, dep habarlaıdy “Adyrna” ulttyq portaly Express Qazaqstan saıtyna silteme jasap. 

Serikgúl Sálıdiń aıtýynsha, qazaq jigitteri qazaq qyzdarynyń boıyndaǵy adamgershilik, uıańdyq, ar-uıat, náziktik sekildi ǵajaıyp qasıetterin durys baǵalaı almaı júr. Bul qasıetter basqa elderdiń áıelderinde joıylyp bara jatyr. Sondyqtan ózge el azamattarynyń qazaq qyzdaryna jıi ańsary aýady eken.

Óz basym, qyzdardyń basqa ultqa shyǵýyna qarsy emespin. Óıtkeni qazaq jigitteriniń ómirge kózqarastary óte eskirgen. Áıelderdi ózinen tómen sanaıdy. Teńdik bermeıdi. Belgili bir sheńberge syıdyrǵysy keledi,

— deıdi psıholog.

Al qazaq áıelderi ol sheńberden shyqqysy keledi. Dene bitimi turǵysynan emes, metafızıka, ómirge kózqarasy jaǵynan er adammen teń ekenin sezinedi.

Sondyqtan qazaq jigitteriniń kózqarasyna kelispeıdi. Sol sheńberdiń ishinde ómir súrip jatqan áıelder áli de kóp,

—deıdi Serikgúl Sálı.

Mamannyń aıtýynsha, ózge ultqa turmysqa shyqqan áıelder men ózge ulttyń qyzyna úılegen jigitterde biraz aıyrmashylyq bar. Jigitterge qaraǵanda, qyzdar ulttyq mentalıtetti berik ustaıdy eken. Basqa ultqa bala týyp berse de, ony qazaq ultynyń mentalıtetinde tárbıelemek. Al jigitterdiń balalary sol ultqa sińip ketetin kórinedi.

Men sheteldikterge kúıeýge shyqqan 20-ǵa jýyq qyzdy bilemin. Biri Italıada, biri Túrkııada turyp jatsa da, bári balasyn Qazaqstanǵa ákep týyp jatyr. Balany ana tárbıeleıdi. Balasynyń boıyna qazaq mentalıtetin sińiredi,

—deıdi Serikgúl Sálı.

Dese de, qoǵamda qazaq qyzdarynyń sheteldikterge turmysqa shyǵýyna qarsylyq óte kúshti. Máselen, Talǵar mańynda qazaq qyzyna úılenip jatqan qytaı jigiti toıyn toqtatýǵa májbúr boldy. Afrıkalyq jigitke turmysqa shyqqan qyzdyń uzatýy jelilerde áli tolqý týdyryp otyr. Tipti, qazaq qyzymen sóılesip turǵan sheteldikterdi tyrqyratyp qýyp júrgenin áleýmettik jelide turaqty túrde jarııalap júrgen adamdar da bar.

Álemniń damý úrdisinen kóp adamnyń habary joq. Jańa ómir keńistigi — ınternet paıda bolǵan. Ǵalamtor barlyq shekaralardy óshirdi. Qazirgi balalardyń qundylyǵy — aıfon, Morgenshtern. Múlde basqa urpaq ósip keledi,

—deıdi psıholog.

Onyń aıtýynsha, qazir eki býyn arasyndaǵy kúres júrip keledi. Nátıjesinde, bolashaqta ulttyq qundylyqtar tolyq joıylmasa da, oǵan túbegeıli ózgeris enbek.

”Adyrna” ulttyq portaly

Pikirler