توقاەۆ حالىقارالىق كونفەرەنتسيانىڭ اشىلۋىمەن قۇتتىقتادى

3259

مەملەكەت باسشىسى قاسىم-جومارت توقاەۆ حالىقارالىق كونفەرەنتسيانىڭ اشىلۋىمەن قۇتتىقتادى، دەپ حابارلايدى اقوردا رەسمي سايتى.

“بارشاڭىزدى «ۇلىق ۇلىس – التىن وردا» اتتى حالىقارالىق كونفەرەنتسيانىڭ اشىلۋىمەن قۇتتىقتايمىن!

بۇل القالى جيىن تاۋەلسىزدىگىمىزدىڭ 30 جىلدىق مەرەيلى بەلەسىنە وراي وتكىزىلۋدە. التىن وردانىڭ تاريحى قازىرگى قازاق مەملەكەتتىگىنىڭ جىلناماسىمەن تىعىز بايلانىستى. ايگىلى جوشى حان كەسەنەسى مەن سارايشىق قالاسىنىڭ قازاقستان اۋماعىندا ورنالاسۋى جانە شەتەل مۇراعاتتارىنان كوپتەگەن جازبا دەرەكتەردىڭ تابىلۋى – وسىنىڭ ايقىن دالەلى.          

شىن مانىندە، التىن وردانىڭ تاريحى ءالى دە تەرەڭ زەرتتەۋدى قاجەت ەتەدى. ءتۇرلى سەبەپتەرگە بايلانىستى ءتول شەجىرەمىزدىڭ وسى بىرنەشە عاسىرلىق كەزەڭى نازاردان تىس قالدى. ەلىمىز ەگەمەندىگىن العاننان كەيىن عانا بۇل ولقىلىقتىڭ ورنىن تولتىرۋعا جول اشىلدى.

ەلباسىنىڭ باستاماسىمەن قولعا الىنعان اۋقىمدى باعدارلامالار جۇرتىمىزدىڭ تاريحي ساناسىن جاڭعىرتۋعا زور ۇلەس قوستى.

سانمىڭ جىلدىق شەجىرەمىزدەگى ساباقتاستىق جالعاسىن تاۋىپ، ۇلتتىق رۋحىمىز بيىكتەي ءتۇستى.    

ءبىز التىن وردا داۋىرىنەن جەتكەن قۇندى جادىگەرلەردى دۇنيە جۇزىنە تانىتىپ، ونى تۋريزم سالاسىن دامىتۋ ءۇشىن ءتيىمدى پايدالانۋىمىز كەرەك. جايىق جاعاسىنداعى جانە ۇلىتاۋ باۋرايىنداعى كونە ەسكەرتكىشتەر مەن زاماناۋي كەشەندەر بۇعان تولىق مۇمكىندىك بەرەدى.

تاريحىن تۇگەندەپ، ودان تاعىلىم الا بىلگەن ەلدىڭ تامىرى بەرىك بولادى. التىن وردا كوپتەگەن باۋىرلاس ەلدەردىڭ تاعدىرىندا دا ايرىقشا ءىز قالدىرعان. سوندىقتان، حالىقارالىق عىلىمي قاۋىمداستىقتىڭ الدىندا ورتاق شەجىرەمىزدى بىرلەسە زەرتتەۋ مىندەتى تۇر.      

بۇگىنگى باسقوسۋدا عالىمدارىمىز تىڭ دەرەكتەر مەن سالماقتى وي-پىكىرلەرىن ورتاعا سالادى دەپ سەنەمىن.    

كونفەرەنتسيا جۇمىسىنا تابىس تىلەيمىن!”،- دەدى توقاەۆ رەسمي سايتتا جاريالانعان جازبادا.

”ادىرنا” ۇلتتىق پورتالى

پىكىرلەر
ۇقساس جاڭالىقتار
Серіктес/Партнер
Студия IMA - создание сайтов