Hromtau qalasynyŋ būrynǧy äkımı Saǧyndyq Şabyqbaev para alǧany üşın kınälı dep tanylyp, aiyppūl arqalady, dep habarlaidy «Adyrna» tılşısı «Diapazonǧa» sılteme jasap.
Is materialdaryna säikes, şeneunık memlekettık satyp alu aiasynda oryndalǧan jūmystardy eş kedergısız qabyldaǧany üşın merdıgerden 400 myŋ teŋge kölemınde para alǧan. Parany beru kezınde deldal retınde äkımnıŋ tanysy Nūrbek Qazbek äreket etken. Ol merdıgermen kelıssöz jürgızgen. Nūrbek Qazbekke para talap etu deregı boiynşa da aiyp taǧylǧan, alaida būl epizod boiynşa merdıger tarapynan keşırım jasalǧan.
Ekı aiyptaluşy da kınälaryn tolyq moiyndady. Is qysqartylǧan tärtıppen qaralǧan.
Hromtau qalasynyŋ būrynǧy äkımı Saǧyndyq Şabyqbaevqa alǧan parasynyŋ 30 eselengen mölşerınde, iaǧni 12 million teŋge kölemınde aiyppūl taǧaiyndaldy. Qamauda bolǧan uaqyty esepke alynyp, aiyppūldyŋ tüpkılıktı somasy 11 355 151 teŋgenı qūrady. Sondai-aq ol ömır boiyna memlekettık qyzmette, sot organdarynda jäne jergılıktı özın-özı basqaru organdarynda qyzmet atqaru qūqyǧynan aiyryldy. Nūrbek Qazbek te kınälı dep tanylyp, oǧan da paranyŋ 30 eselengen mölşerınde – 12 million teŋge aiyppūl salyndy. Qamauda bolǧan uaqyty (660 576 teŋge) esepke alynyp, aiyppūldyŋ tüpkılıktı somasy 11 339 424 teŋgenı qūrady.
Aita keteiık, endı Hromtau qalasynda äkımdı qaita sailau ötedı. Dauys beru 11 qaŋtarǧa belgılengen.
40 jastaǧy Saǧyndyq Şabyqbaev Hromtau qalasynyŋ äkımı qyzmetıne 2023 jyldyŋ qyrküiegınde taǧaiyndalǧan. Eŋbek jolyn oblystyq HQKO filialynda inspektor bolyp bastaǧan. Keiın Äiteke bi audany, Hromtau audany jäne Hromtau qalasy äkımdıkterınıŋ apparattarynda qyzmet atqarǧan. 2018 jyldyŋ jeltoqsanynan 2023 jyldyŋ qyrküiegıne deiın Hromtau äkımınıŋ orynbasary bolǧan. 2025 jyldyŋ qaraşasynda ol para aldy degen küdıkpen ūstalyp, ekı aiǧa qamauǧa alynǧan. 11 jeltoqsanda būl ıs boiynşa sot prosesı bastalǧan.
