Almaty qalalyq áleýmettik qorǵaý basqarmasynyń bas mamany para alǵany úshin sottaldy. Bul týraly Sybaılas jemqorlyqqa qarsy is-qımyl agenttiginiń baspasóz qyzmeti málimdedi, dep habarlaıdy “Adyrna” ulttyq portaly.
Antıkordyń habarlaýynsha, sot úkimimen Almaty qalasy boıynsha Áleýmettik qamsyzdandyrý basqarmasynyń eńbek qaýipsizdigin baqylaý bóliminiń bas mamany – memlekettik eńbek ınspektory A.K.Qaparov Qylmystyq Kodekstiń niń 366-babynyń 3-bóligi, 4-tarmaǵynda kózdelgen qylmysty jasaǵany úshin kináli dep tanyldy.
«A.K.Qaparov eńbek qaýipsizdigi jáne eńbekti qorǵaý boıynsha kýrsty aıaqtaǵany týraly sertıfıkattarǵa kedergisiz jáne jedel qol qoıý úshin oqý ortalyqtarynyń ókilderinen birneshe ret 150 000 teńgege deıin para alǵan» delingen habarlamada.
Oǵan ómir boıyna memlekettik qyzmette, jergilikti ózin-ózi basqarý organdarynda, memlekettik uıymdarda jáne kvazımemlekettik sektor sýbektilerinde laýazymdardy atqarý quqyǵynan aıyra otyryp, 1 819 740 teńge mólsherinde aıyppul salyndy.
Úkim zańdy kúshine engen joq.
“Adyrna” ulttyq portaly
