Táýelsizdik alǵannan bergi jyldardy Qazaqstannan, shamamen, 100 mıllırd dollar zańsyz shyǵarylǵan. Bul týraly ulttyq ekonomıka mınıstri Álibek Qýantyrov aıtty, dep habarlaıdy “Adyrna” ulttyq portaly
"Elimizge tartylǵan tikeleı sheteldik ınvestıııalardy alatyn bolsaq, onyń kólemi úlken, 30 jyldyń ishinde 400 mıllıard dollardan asady. Biraq ondaǵan mıllıard shyǵarylǵan, shamamen, 100 mıllıard, odan sál kópteý shyǵar", - dedi Qýantyrov brıfıngte.
Sondaı-aq, qazir sheteldegi kapıtaldy qaıtarý boıynsha arnaıy komıssııa jumys istep jatyr. Al Ádilet mınıstri Qanat Mýsın aldaǵy ýaqytta qarjynyń qaıtarýdyń naqty tetikteri engiziletinin aıtty.
"Búginde sheteldegi kapıtaldy qaıtarý joldary qaralyp jatyr. Bul ońaı sharýa emes. Ony birden sheshýge bolady dep aıta almaımyn. Biraq qajetti sharalardyń bári atqarylyp jatyr", - dep atap kórsetti Mýsın.
Kapıtaldy qaıtarý sharalarynyń ishinde salyqtyq jáne salyqtan tys yntalandyrý tetikteri bar.
"Qazirgi kezde biz salyqtyq yntalandyrý boıynsha belsendi jumys istep jatyrmyz. Bir jaǵynan aqshany jylystatýǵa tosqaýyl qoıamyz. Máselen, salyqtyq sharalardyń biri – ol dıvıdendter boıynsha jeńildikterdi alyp tastaý. Buryn ınvestorlar ony tóleımeıtin. Ony bas kompanııaǵa shyǵarýǵa nemese belgili bir qyzmetterdi satyp alýǵa múmkindik bolǵan. Biz salyqtyq jeńildikter de jasaımyz", - deıdi mınıstr Qýantyrov.
Qazirgi kezde Ulttyq ekonomıka mınıstrligi Salyq kodeksine ózgerister engizý boıynsha zań jobasyn ázirleýge kiristi.
“Adyrna” ulttyq portaly
